UYIRI

Nature writing in Tamil

ஊசிவால் குளவிகள்

leave a comment »

வீட்டினுள் சன்னலுக்குப் பக்கத்தில் அமர்ந்து டீவி பார்த்துக்கொண்டிருந்த போது அங்கு பறந்து வந்த பூச்சியின் மேல் கவனம் திரும்பியது. கண்ணாடி சன்னல் கதவு மரச்சட்டங்கள் கொண்டது. அந்தப் பூச்சி மரச்சட்டத்தினருகில் பறந்து கொண்டே இருந்தது. எனது கவனத்தை ஈர்த்ததற்குக் காரணம் அதன் உருவம். அப்படி ஒன்றும் பெரிய பூச்சி இல்லை, இருந்தாலும் பறக்கும் போது அதன் நீண்ட கால்கள் கீழே தொங்கிக் கொண்டும், வயிற்றுப்பகுதியிலிருந்து ஊசி போன்ற நீண்ட அமைப்பும் இருந்ததை காணமுடிந்தது. இந்த வகைப் பூச்சியை பார்ப்பது இதுதான் முதல் முறை. கரிய நிறத்தில் இருந்தது. பறந்து கொண்டே இருந்ததால் சரியாக வேறு அங்க அடையாளங்களை கவனிக்க முடியவில்லை. சுமார் 30 வினாடிகள் மரச்சட்டத்தின் மேலும் கீழும் பறந்து திடீரென பார்வையை விட்டு அகன்றது.

இரண்டு நாள் கழித்து களப்பணிக்காக நாற்றுப்பண்ணைக்குச் சென்ற போது மறுபடியும் இப்பூச்சியைக் கண்டேன். அப்போது காமிரா கையில் இருந்தது. சிறு பூச்சிகளை படமெடுக்க உதவும் மேக்ரோ லென்சை (Macro lens) பொருத்தி தயாராக வைத்துக்கொண்டேன். வழக்கம் போல பறந்துகொண்டே இருந்தது, அமரும் போது தானே படமெடுக்க முடியும். ஆகவே அப்பூச்சியை கவனிக்க ஆரம்பித்தேன். கீழே விழுந்து கிடந்த ஒரு பழைய பெரிய மரத்தண்டின் மேற்பரப்பில் பறந்து கொண்டிருந்தது. நீளவாக்கில் தரையில் கிடந்து மட்கி வரும் மரத்தின் ஒரு முனையிலிருந்து மறுமுனைக்கு பறந்தபடியே இருந்தது. மரத்தின் மேற்பரப்பில் அவ்வப்போது கால்களை தட்டித் தட்டி பறப்பது போலத் தெரிந்தது. வெகு அருகில் வேகமாகச் சென்றால் கண் காணமுடியாத இடத்திற்கு பறந்தோடிவிடும் என்பதால், மெல்ல மெல்ல அம்மரத்தின் அருகில் சென்று அமர்ந்த்தேன். மழை பெய்திருந்ததால் தரையும், அந்த மட்கும் மரமும் ஈரமாக இருந்தது. சுமார் 5 நிமிட கவனிப்பிற்குப் பின் புரிந்தது அந்தப் பூச்சி ஒரு குளவி வகையைச் சேர்ந்தது என்பது. அதுவும் ஒரு விசித்திரமான ஊசிவால் குளவி வகை என்பது புரிந்தது. இந்த வகையான குளவியை புகைப்படங்களில் கண்டதுண்டு எனினும் நேரில் பார்ப்பது இதுதான் முதல் முறை.  ஆர்வத்துடன் பார்த்துக்கொண்டிருந்த போதே கண்களை விட்டு அகன்றது. சிறிது நேரம் அங்கேயே அமர்ந்திருந்தேன், ஒருவேளை திரும்பவும் அங்கு பறந்து வரக்கூடும் எனும் நம்பிக்கையில். ஆனால் மழைதான் வந்தது. இரண்டாவது முறையும் படம் பிடிக்க முடியாததால் கொஞ்சம் ஏமாற்றமாகத்தான் இருந்தது.

ஓரிரு நாட்கள் கழித்து வீட்டில் இருந்தபோது அப்பா என்னை அழைத்து, அன்று பார்த்த பூச்சி வாசல் கதவின் அருகில் இருப்பதாகச் சொன்னார். சென்று பார்த்தபோது ஊசிவால் குளவி (Ichneumon Wasp)!

வீட்டில் சன்னலை திறந்து வைத்திருக்கும் போது சில நேரங்களில் பூச்சிகள் உள்ளே வந்து, வெளியில் செல்ல முடியாமல் சுவற்றிலும், கண்ணாடி சன்னல் கதவுகளிலும் முட்டி முட்டி பறந்து கொண்டிருக்கும். அவை வெளியேற முடியாமல் தவிப்பதை பார்க்க பாவமாக இருக்கும். ரீங்காரமிடும் பூச்சிகளாக இருந்தால் நமக்குத் தெரிந்து விடும். ஆனால் சில பூச்சிகள் ஓசை ஏதும் எழுப்பாமல் பறந்துகொண்டிருந்தால் அவை நம் கவனத்திற்கு வராது, நாம் பார்த்தால் ஒழிய. அப்படிப்பட்ட பூச்சிகள் சில சன்னல் ஓரங்களில் மடிந்து கிடக்கும். அதைத் தவிர்க்க ஏதாவது பூச்சிகள் வெளியே போக முடியாமல் பறந்து கொண்டிருந்தால் உடனே சன்னலை அல்லது வாசல் கதவை திறந்து வைத்து அவை வெளியே பறந்து செல்ல ஏது செய்வது என் வழக்கம். அவை வெளியேறும் வரை காத்திருந்து கதவை உடனடியாக மூடிவிடுவேன். இந்த ஊசிவால் குளவியும் அப்படித்தான் உள்ளே வந்திருக்க வேண்டும். வாசல் கதவின் ஓரத்தில் இருந்த ஒட்டடையில் சிக்கிக் கொண்டு மெதுவாக சிரமத்துடன் மேலே ஏறுவதும் பின்பு கீழே விழுவதுமாக இருந்தது. பாவம், வெகுநேரமாக இப்படி வெளியே போக முயன்று களைத்துப் போயிருக்க வேண்டும். அது வெளியே செல்ல கதவைத் திறக்கும் முன் காமிராவில் வீடியோவும், படமும் எடுத்துக்கொண்டேன். பின்பு ஒரு விளக்குமாத்துக் குச்சியை எடுத்து அதனருகில் வைத்த போது அதன் மேலே மெல்ல ஏறிக்கொண்டது. வெளியில் எடுத்துச் சென்றவுடன் பறந்து போய் விடும் என நினைத்தேன். ஆனால் அக்குச்சியில் அமர்ந்து கால்களால் உடலை சுத்தம் செய்து கொண்டிருந்து விட்டு ஒரிரு நிமிடங்களில் பறந்து சென்றது. அத்தருணத்தில் இந்த ஊசிவால் குளவியை பல கோணங்களில் படமெடுத்துக் கொண்டேன்.

வீட்டுக்குள் வந்த ஊசிவால் குளவியின் பக்கவாட்டுத் தோற்றம்

வீட்டுக்குள் வந்த ஊசிவால் குளவியின் பக்கவாட்டுத் தோற்றம்

ஒரு வித்தியாசமான பூச்சியினத்தை அருகில் பார்த்து படமெடுத்துக் கொண்டதும் அதைவிட உயிருடன் அப்பூச்சியை வெளியே பறக்க விட்டது மனதிற்கு நிம்மதியையும் மகிழ்ச்சியையும் தந்தது. அப்படி என்ன சிறப்பு இந்த ஊசிவால் குளவிக்கு?

பூச்சி வகையில் ஹைமனோப்டிரா வரிசையில் (Order-Hymenoptera) இக்நியூமோனிடே குடும்பத்தைச்  (Family – Ichneumonidae) சார்ந்தது இந்த இக்நியூமன் குளவிகள் (Ichneumon wasps). நான் பார்த்த குளவிக்கு கருப்பான உடல். ஒளி ஊடுருவும் தன்மை கொண்ட மெல்லிய இறக்கைகள் அதில் கருப்புக் கோடு போன்ற நரம்புகள். தலையில் இரு புறமும் பெரிய கூட்டுக்கண்கள், முன்னே இரு உணர் நீட்சிகள். மார்புப் பகுதியையும் தலையையும் இணைக்கும் காம்பு போன்ற கழுத்து. மார்புப் பகுதியில் (Thorax) ஆறு கால்கள். முதலிரண்டு சோடி கால்களும் ஒரே நீளமாகவும், பின்னிரண்டு கால்கள் அதைவிட ஒருமடங்கு நீளமாகவும் இருந்தது. இந்தக் கால்தான் இவை பறக்கும் போது தொங்கிக் கொண்டிருக்கும். மார்புப் பகுதியை அடுத்து நீள் உருளை வடிவில் ஆறு கண்டங்களைக் கொண்ட வயிற்றுப்பகுதி. மார்புப் பகுதியில் இணைந்திருக்கும் கண்டம் சன்னமாகவும் இறுதிக் கண்டம் பருத்தும் இருந்தது. ஆச்சர்யக்குறியைப் கிடைமட்டமாக வைத்தது போல. இந்த வயிற்றுப் பகுதியின் கடைசிக் கண்டத்தில் இருந்து நீண்ட ஊசி போன்ற முட்டையிடும் நீட்சி (ovipositor). அந்நீட்சியின் முனை (சுமார் 3-4 மில்லி மீட்டருக்கு) வெள்ளையாக இருந்தது. தலையிலிருந்து வயிற்றுப்பகுதி வரை சுமார் 2 செமீ நீளமும், அதே அளவு முட்டையிடும் நீட்சியும் இருந்தது. இதை வைத்தே இதை ஒரு பெண் குளவி என்று சொல்லிவிடலாம். இவ்வளவு நீளமான முட்டையிடும் நீட்சியை வைத்துக்கொண்டு இக்குளவி செய்வது என்ன? இந்த ஊசிவால் குளவிகளின் சிறப்பம்சமே அவற்றின் முட்டையிடும் பண்புதான்.

ஊசிவால் குளவியின் மேற்புறத்தோற்றம்

ஊசிவால் குளவியின் மேற்புறத்தோற்றம்

பெண் குளவி மட்கிப்போன மரங்களின் மேற்பரப்பில் தனது உணர்நீட்சிகளால் தட்டித் தட்டி பறக்கும். அப்படிச் செய்வதன் மூலம் மரத்தின் உள்ளே இருக்கும் பூச்சிகளின் வேற்றிளரிகள் (லார்வா), புழுக்கள் இருப்பதை அறிந்துகொள்ளும். எதற்காக? ஊசிவால் குளவிகள் ஒட்டுயிரிகள் (Parasites). அவை மரக்கட்டைகளின் உள்ளே வசிக்கும் இளம் பருவத்திலுள்ள பூச்சிகள் சிலவற்றின் உடலிலோ, அவற்றைன் அருகிலோ தமது நீண்ட ஊசிபோன்ற நீட்சியின் உதவியால் முட்டையிடும். ஊசிவால் குளவியின் முட்டை பொரிந்து அந்தப் புழு இளம்பருவ பூச்சியினை (அவை உயிருடன் இருக்கும் போதே) கொஞ்சம் கொஞ்சமாக சாப்பிட ஆரம்பிக்கும். ஊசிவால் குளவி கூட்டுப்புழு பருவம் அடையும் நிலையில் தான் சாப்பிட்டு வந்த ஓம்புயிரி உயிரிழக்கும். இது கொஞ்சம் கொடூரமாகத் தெரிந்தாலும் இயற்கையின் நியதி இதுதான். ஒரு உயிரினம் வாழ இன்னோர் உயிரினம் உயிரிழக்கத்தான் வேண்டும். ஒட்டுயிரி (Parasite)வாழ ஓம்புயிரியின் (host) உதவி அவசியம். அதுபோலவே ஓம்புயிரிகளின் எண்ணிக்கையை கட்டுப்படுத்த ஊசிவால் குளவி போன்ற ஒட்டுயிரிகளின் சேவையும் அவசியம்.

******

தி ஹிந்து தீபாவளி மலர் 2013ல் வெளியான கட்டுரை.

Advertisements

Written by P Jeganathan

December 17, 2013 at 2:00 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: