UYIRI

Nature writing in Tamil

Posts Tagged ‘House Sparrow

பறவைக் கீர்த்தனைகள்

leave a comment »

பறவைகள் மனித குலத்தை ஆதியில் இருந்தே வியக்க வைத்துக் கொண்டிருக்கின்றன. பறவைகளின் வாழ்வியலில் நம் அனைவரையுsம் பெரிதும் கவர்வது அவற்றின் பறக்கும் திறனும், இனிமையான குரலொலியுமே! பறவைகளின் கண்கவர் நிறங்களும், கூடுகட்டுதல், வலசை போதல் போன்ற சில வித்தியாசமான பண்புகளும் நம்மை வியக்க வைத்ததாலும், பறவைகளை சரியாக அவதானிக்கும் பழக்கமும், ஆர்வமும் இல்லாதவர்களையும் கூட ஈர்ப்பது அவற்றின் குரலொலி. மனித குலம் முதன்முதலில் இரசித்த இசை பறவைகளுடையதாகத்தான் இருக்க வேண்டும். அப்பொழுதிலிருந்தே பறவைகள், மனிதர்களின் எண்ணங்களையும், கற்பனைகளையும் ஆட்கொண்டு அவற்றைப் பற்றி இலங்கியங்களில், இசையில், நாட்டியங்களில், ஓவியங்களில், கவிதைகளில் என பல்வேறு கலை வடிவங்களில் பதிவு செய்ய தூண்டுகோலாய் இருந்திருக்கின்றன.

தமிழ் செவ்விலக்கியங்களில் குறிப்பாக, பாடல்களிலும் கவிதைகளிலும் செங்கால் நாரை, கானமயில், சிட்டுக்குருவி என பல பறவைகள் இடம் பெற்றிருக்கும். நாட்டுப்புறப் பாடல்களிலும், சிறுவர் பாடல்களிலும்கூட பல பறவைகள் இடம் பெற்றிருக்கும். ஆயினும் இவை யாவும் உவமைகளாகவோ, உருவகங்களாகவோ, சிறு குறிப்புகளாகவோ அல்லது மிஞ்சிப் போனால் ஓரிரு முழுப் பாடல்களாகவோ மட்டுமே இருக்கும். பறவைகளைப் பற்றி மட்டும், அல்லது ஒரு குறிப்பிட்ட வகைப் பறவையைப் பற்றி மட்டும் புகழ்பாடும் கவிதைகளும், பாடல்களும் அரிதே.

மாறாக ஆங்கிலத்தில் பறவைகளுக்காகவே எழுதப்பட்ட கவிதைகளைக் காணமுடிகிறது. எடுத்துக்காட்டாக, ஜான் கீட்ஸ் (John Keats) எழுதிய நைட்டிங்கேல் எனும் அழகாகப் பாடும் பறவையைப் பற்றிய “Ode to a Nightingale” எனும் கவிதை, வானம்பாடி குறித்த “To a Skylark” எனும் ஷெல்லியின் (P B Shelly) கவிதை. இன்னும் பல பறவைகளைப் பற்றிய கவிதைகளை Billy Collins தொகுத்த “Bright Wings” நூலிலும், Simon Armitage & Tim Dee தொகுத்த “The Poetry of Birds” நூலில் காணலாம்.

ஆங்கிலத்தில் இருக்கும் அளவிற்கு இல்லை என்றாலும், அண்மைய காலங்களில் தமிழிலும், செல்வமணி அரங்கநாதனின்மாட்டுவண்டியும், மகிழுந்தும்…”, (பொன்னுலகம் பதிப்பகம்), அவைநாயகனின் “காடுறை உலகம்” (ஓசை வெளியீடு), ம. இலெனின் தங்கப்பாவின் “உயிர்ப்பின் அதிர்வுகள்” (தமிழினி பதிப்பகம்) முதலிய நூல்களில் இயற்கை குறித்தும், பறவைகள் குறித்தும் பல கவிதைகளைக் காணலாம். பறவைகளை மட்டுமே கொண்ட கவிதைத் தொகுப்பு ஆசையின் “கொண்டலாத்தி” (க்ரியா வெளியீடு). இவை எனது கண்களில் பட்டவை, எனக்குத் தெரியாமல் வேறு சில நூல்களும் இருக்கக்கூடும்.

தமிழ் சினிமாப் பாடல்களில் சில இடங்களில் சில பறவைகளைப் பற்றிய குறிப்புகளும் வரும். சில காலத்திற்கு முன் சிட்டுக்குருவி எத்தனை சினிமாப் பாடல் வரிகளில் வருகிறது என கணக்கிட்டதில் சுமார் 20 பாடல்களை பட்டியலிடமுடிந்தது. ஆனாலும், முழுப்பாட்டும் அந்தப் பறவைக்காக இருக்கவில்லை. எதோ எதுகை மோனையாக அமைய வேண்டும் என்பதற்காகவே சிட்டு எனும் வார்த்தையை பயன்படுத்தி இருப்பார்கள். சிட்டுக்குப் பிறகு தொட்டு, பட்டு, மெட்டு போன்ற வார்த்தைகளையும், குருவிக்கு அடுத்ததாக அருவியும் இருக்கும்.

பறவைகள் பற்றிய கவிதைகள் இருந்தாலும் அவற்றை இசையமைத்துப் பாடலாகப் பாடியது தமிழில் இதுவரை இருந்ததாகத் தெரியவில்லை. அந்தப் பெரும் குறையை எழுத்தாளர் பெருமாள்முருகனும், கர்நாடக சங்கீதப் பாடகர்கள் சங்கீதா சிவக்குமாரும், T.M.கிருஷ்ணாவும், போக்கியிருக்கிறார்கள். எந்த ஒரு முன் உதாரணமும் இல்லாத இந்த அருமையான முன்னெடுப்பில் பாடல் பெற்ற பறவைகள், சிட்டுக்குருவி, ஆந்தை, காகம், பனங்காடை, குயில் ஆகிய பறவைகள். இந்தப் பாடல்கள் அனைத்தையும் T.M.கிருஷ்ணாவின் யூடியுப் சேனலில் கேட்டு மகிழலாம்.

பெருமாள் முருகனின் படைப்புகளில் இயற்கையை நுட்பமாக அவதானித்து எழுதப்பட்ட பல செய்திகளையும், குறிப்புகளையும், உயிரினங்களின் வட்டாரப் பெயர்களையும் காணலாம். தமிழில் பசுமை எழுத்தின் முன்னோடியான மா. கிருஷ்ணன், கலைக்களஞ்சியத்தில் எழுதிய பறவைகளைப் பற்றிய விளக்கங்களையும், வேடந்தாங்கல் பற்றிய குறுநூலையும் “பறவைகளும் வேடந்தாங்கலும்” எனும் நூலாகத் தொகுத்தவர். இப்போது பறவைக் கீர்த்தனைகள், என இயற்கையைப் பற்றிய விழிப்புணர்வை அனைவரிடமும் ஏற்படுத்துவதை தொடர்ந்து செய்து வருகிறார். பறவைகளின் பண்புகளை உற்று நோக்கியும் அவற்றின் சரியான பெயரையும் தெரிந்த ஒருவர் இது போன்ற கீர்த்தனைகளை எழுதியது மகிழ்ச்சி அளிக்கிறது.

கீர்த்தனை என்றாலே கடவுள் சார்ந்தது எனும் எண்ணத்தை மாற்றி இயற்கைக்கும் எனதாக்கிய கர்நாடக சங்கீத பாடகர் தம்பதியரான சங்கீதா சிவக்குமார், T.M.கிருஷ்ணா, அவரது குழுவினரையும் எவ்வளவு பாராட்டினாலும் தகும். இசையைப் பற்றி குறிப்பாக கர்நாடக இசையைப் பற்றிய ஞானம் ஏதும் எனக்கு இல்லை. இருப்பினும் பறவைகளையும், இயற்கையின் கூறுகளையும் கொண்ட எந்த ஒரு கலைப்படைப்பும் இயற்கை ஆர்வலர்களை மிகவும் மகிழ்வுறச் செய்யும். குறிப்பாக இயற்கையின் விந்தைகளைப் பற்றியும், இயற்கையின் ஒரு அங்கமான பறவைகளின் பாதுகாப்பு குறித்தும் பொதுமக்களுக்கு விழிப்புணர்வு ஏற்படுத்தும் பணியில் முனைந்திருக்கும் இயற்கை கல்வியாளர்களுக்கு இது போன்ற கலைப்படைப்புகள் உதவியாக இருக்கும்.

இயற்கையையும் பறவைகளையும் போற்றி, வர்ணித்து மட்டும் எழுதாமல் அவற்றிற்கு ஏற்படும் பாதிப்புகள் குறித்தும், அவற்றைப் பாதுகாக்க நாம் அனைவரும் செய்யவேண்டியவை குறித்தும் பாடல்கள் அதிகம் வரவேண்டும். எண்ணூர் கழிமுகம் குறித்து T.M. கிருஷ்ணா பாடிய “புறம்போக்கு” பாடலைப் போல பறவைகளுக்கும் அவற்றின் வாழிடங்களுக்கு ஏற்படும் பல்வேறு பாதிப்புகள் குறித்தும் பாடல்கள் வரவேண்டும். பறவைகளோடு இல்லாமல், இயற்கையின் அங்கமான வண்ணத்துப்பூச்சி, தட்டான்கள், மரங்கள் என பல்வேறு உயிரினங்கள் குறித்தும் இது போன்ற பாடல்கள் வர வேண்டும். பெருமாள்முருகன் – T.M. கிருஷ்ணா தொகுப்பில் நீர், நிலம், காற்று, தீ, ஆகாயம் ஆகிய இயற்கையின் அங்கங்களைப் பற்றியும், பனை மரத்தைப் பற்றியும் கூட கீர்த்தனைகள் இருப்பது குறிப்பிடத்தக்கது.

இந்த படைப்புகளை முன்னுதாரணமாகக் கொண்டு, கலைத்துறையில் இயற்கையின் பால், இயற்கை பாதுகாப்பின் பால் ஆர்வம் உள்ள அனைவரும் இது போன்ற பல முயற்சிகளில் ஈடுபடவேண்டும். இந்த வகையில் தீட்சிதா வெங்கடேசனும், அரிவரசும் பாடிய, அண்மையில் நாம் அனைவரையும் கவர்ந்த, மற்றுமொரு பாடல் “எஞ்சாயி, எஞ்சாமி”. இது போல இயற்கை சார்ந்த ராப் பாடல்கள், கானா பாடல்கள் எல்லாம் வர வேண்டும்.

இயற்கையின் விந்தைகளைக் குறித்தும், பாதுகாப்பு குறித்தும் ஆங்கிலத்தில் பதிப்பிக்கப்படும், புள்ளிவிவரங்களைக் கொண்ட ஆராய்ச்சி கட்டுரைகளைக் காட்டிலும், அவற்றைத் தழுவி தாய் மொழிகளில் எழுதப்படும் கட்டுரைகள் தான் பொதுமக்களை எளிதில் சென்றடையும். இது குறித்த விளக்கக் காணொளிகளும், ஆவணப்படங்களும், ஓவியங்களும், சிற்பங்களும், கேலிச்சித்திரங்களும் உதவும். இவற்றின் வரிசையில் இயற்கை பாதுகாப்பிற்கு இசையும் பேருதவி புரியும்.

கலையின் எல்லா வகைகளிலும், வடிவங்களிலும் இயற்கையைப் போற்றவும், பாதுகாக்கவும் படைப்புகள் பல வர படைக்கப்பட வேண்டும். அந்தந்த துறைசார் வல்லுனர்களின் கூட்டணிகள் பல உருவாக வேண்டும். இதற்கு பறவைக் கீர்த்தனைகள் ஒரு முன்னோடியாகத் திகழும் என நம்புவோம்.

—–

தி இந்து தமிழ் 30 May 2021 அன்று வெளியான கட்டுரையின் முழு வடிவம். அக்கட்டுரைக்கான உரலி இங்கே.

பறவைகள்: மூட நம்பிக்கைகளும், அறிவியல் விளக்கங்களும்.

with 4 comments

1. சிட்டுக்குருவிகள் அழியும் நிலையில் உள்ளனவா? அதற்கு கைபேசி கோபுரங்களின் கதிர்வீச்சு காரணமா?

House Sparrow

House Sparrow (Male)

சிட்டுக்குருவிகள் அழியும் நிலையில் இல்லை. இவை உலகெங்கும் பரவியுள்ளன. ஒரு சில நாடுகளில், நகரமயமாதல், இனப்பெருக்கக் காலங்களில் குஞ்சுகளுக்கு ஏற்ற உணவு (பூச்சிகள்) கிடைக்காத காரணங்களால், ஒரு சில இடங்களில் மட்டும் குறைந்தும், அற்றும் போயிருக்கலாம். ஆனால், கைபேசி கோபுரங்களில் இருந்து வரும் மின்காந்த அலைகளினால் எண்ணிக்கையில் குறைகின்றன, முற்றிலுமாக அழிந்து வருகின்றன என்பது அறிவியல் பூர்வமாக நிரூபிக்கப்படாத கூற்று.

2. ஆந்தை, கூகை இனப் பறவைகள் ஆஸ்திரேலியாவிலிருந்து வருபவையா?

https://commons.wikimedia.org/wiki/File:Tyto_javanica_stertens,_Thrissur,_India.jpg

Barn Owl. Photo: Wikimedia Commons

செய்திகளில் அவ்வப்போது வெளியிடப்படும், கூகை அல்லது வெண்ணாந்தை, தலை உச்சியில் கொத்தாகச் சிறகுகள் கொண்டு கொம்பு போலக் காட்சியளிக்கும் ஆந்தைகள் வெளிநாட்டில் இருந்து வருபவை என்பது தவறான தகவல். கூகை உலகின் பல பகுதிகளில் பரவலாகத் தென்படும் ஒரு பறவை. அவை கோயில் கோபுரங்கள், பழைய கட்டிடங்களில் பகலில் அடைந்து இரவில் வெளியே வந்து இரைதேடும். தென்னிந்தியாவிற்கு Short-eared Owl (Asio flammeus) எனும் ஒரே ஒரு ஆந்தை வகை மட்டுமே வலசை வருகிறது. ஏனையவை இங்குள்ளவையே.

3. பாறு கழுகுகளை தவறான கருத்துக்களின் பிரதிநிதிகளாக, தீய எண்ணங்களின் உருவகமாக, எதிர்மறையாக வரைபடங்களில் சித்தரிக்கப்படுவது சரியா?

Indian Vulture. Photo Wikimedia Commons

பாறு கழுகுகள் அழிவின் விளிம்பில் உள்ள பறவை இனம். இவை இறந்த கால்நடைகளையும், பெரிய பாலூட்டிகளான யானை, மான், காட்டெருது முதலிய காட்டுயிர்களின், இறந்த உடல்களையும் உண்டு சுற்றுப்புறத்தை தூய்மையாக வைக்க உதவுகின்றன. கால்நடைகளுக்கு வலிநீக்கி மருந்தான டைக்லோபீனாக் (Diclofenac) கொடுக்கப்படுகிறது. இந்த மருந்து செலுத்தப்பட்ட கால்நடைகள் இறந்த பின்னும் இம்மருந்து அவற்றின் உடலில் தங்கிவிடுகிறது. இம்மருந்து, இந்த இறந்த கால்நடைகளை உண்ணும் பாறு கழுகுகளுக்கு நஞ்சாகிறது. தமிழ் நாட்டில் நீலகிரி மாவட்டத்தில், மாயாறு பகுதியில் சிறிய எண்ணிக்கையில் இப்பாறு கழுகுகள் உள்ளன. அங்குள்ள பூர்வக்குடியினர் இப்பறவைகளை அவர்களது மூதாதையர்களாக மதிக்கின்றனர். ஆனால் அப்பகுதிகளில் குடியேறிய மக்கள் இப்பாறு கழுகுகளைக் காண்பதைக் கெட்ட சகுனமாக நினைக்கின்றனர்.

Cartoon: Internet/Anantha Vikatan

அழிந்து வரும் ஒரு பறவையினத்தைப் பற்றி, தவறான கண்ணோட்டத்தை பொதுமக்களிடம் பரப்புவது முறையாகாது. வெந்த புண்ணில் வேலைப் பாய்ச்சுவது போல, இது போன்ற எதிர்மறைக் கண்ணோட்டங்கள் அப்பறவையினத்தினை பாதுகாக்கும் முயற்சிகளுக்கு தடங்காலாக அமையும்.

4. வெளிநாட்டுப் பறவைகள் இங்கே வந்து கூடமைக்குமா?

பறவைகளுக்கு நாம் வகுத்து வைத்திருக்கும் எல்லைக்கோடுகள் கிடையாது. வடதுருவத்தில் கடும் குளிர் நிலவும் காலங்களில் அங்குள்ள பல பறவையினங்கள் தென் பகுதி நோக்கி வலசை வரும். அப்படி இந்தியா, இலங்கை முதலிய பகுதிகளுக்கு ஆகஸ்டு-செப்டம்பர் மாதங்களில் வலசை வர ஆரம்பிக்கும் பறவைகள் சுமார் ஆறு மாதகாலம் இங்கே இருந்துவிட்டு மார்ச்-ஏப்ரல் மாதங்களில் மீண்டும் அவை வடக்கு நோக்கிப் பயணிக்கின்றன. அப்படி வலசை வரும் பறவைகள் இங்கே கூடமைத்து இனப்பெருக்கம் செய்வதில்லை. இங்கே கூடமைத்து இனப்பெருக்கம் செய்யும் பறவைகளை உள்ளூர்ப் பறவைகள் (Resident Birds) என்றும், வெகுதூரத்தில் இருந்து உணவுக்காக இங்கே வருபவைகளை விருந்தாளிப் பறவைகள் (Migrant birds) என்றும் அழைக்கலாம்.

5. பறவைகளை கூண்டுக்குள் அடைத்து வைத்து வளர்ப்பவர்களை பறவை ஆர்வலர்கள் எனலாமா?

பறவைகளை இயற்கையான சூழலில், அவற்றை எந்த விதத்திலும் துன்புறுத்தாமலும், அவற்றின் வாழிடங்களை எந்த விதத்திலும் சீர்குலைக்காமலும் பார்த்து மகிழ்வோரே பறவை ஆர்வலர் ஆவர். செல்லப்பிராணிகள் விற்கப்படும் கடைகளில் இருந்து பறவைகளை குறிப்பாக வெளிநாட்டுப் பறவைகளை வாங்கி வீட்டில் வளர்ப்பதைப் தவிர்க்க வேண்டும். இப்பறவைகள் (குறிப்பாக கிளிகள்) பெரும்பாலும் அங்கிருந்து திருட்டுத்தனமாக பிடித்து வரப்பட்டவை. அவற்றை நாம் வாங்கினால் மறைமுகமாக அந்தப் பறவைகளின் கள்ள வேட்டைக்கு துணைபுரிகிறோம் என்பதை மனதில் கொள்ள வேண்டும். இப்படி செல்லப்பறவைகள் வர்த்தகத்தால் உலகில் பலவகையான பறவைகள் அழியும் நிலைக்குத் தள்ளப்பட்டுள்ளன.

6. கூண்டில் அடைத்து வளர்க்கப்படும், கள்ளத்தனமாகப்பிடித்து வைக்கப்பட்டிருக்கும் பறவைகளை வெளியேற்றி வானில் பறக்க விடலாமா?

பொதுவாக இது போன்ற பறவைகளின் சிறகுகள் வெட்டப்பட்டு இருக்கும். பறக்க இயலாத இப்பறவைகளை வெளியே விட்டால் வெகுநாட்கள் உயிருடன் இருக்காது. பூனை, நாய் முதலியவை அவற்றை கடித்துக் கொன்றுவிடக் கூடும். அவை வெளிநாட்டிலிருந்து கொண்டு வரப்பட்ட செல்லப்பறவைகளாக இருந்தால் அவற்றை நம் ஊரில் பறக்க விடுவது கூடாது. ஒருவேளை அது உள்ளூர்ப் பறவையாக இருந்தாலும், பறவைகளுக்கு சிகிச்சை அளித்த அனுபவம் உள்ள கால்நடை அல்லது காட்டுயிர் மருத்துவரிடம் காண்பித்து சோதிக்க வேண்டும். அனுமதி பெற்ற காட்டுயிர் காப்பாளர்களிடம் ஒப்படைத்து, காப்பிடத்தில் வைத்து, ஓரளவிற்கு அவை பறக்கும் நிலையை அடைந்த பின்னரே அவை எங்கே பிடிக்கப்பட்டதோ அங்கேயே கொண்டு விட வேண்டும்.

7. பறவைகளுக்கு இரை போடலாமா?

feeding bank mynas

Feeding Bank Mynas

மனிதர்களால் வளர்க்கப்படாத சுதந்திரமாகச் சுற்றித்திரியும் எந்த ஒரு உயிரினத்திற்கும் உணவளித்தல் முறையன்று. சேவை மனப்பான்மையுடன், நல்லது செய்கிறோம் என நினைத்து உணவிடுவது அவற்றிற்கு பெரும்பாலும் பாதகமாகவே முடியும். நாளடைவில் அந்த உயிரினங்களையே நாம் “தொந்தரவு செய்யும் உயிரினங்களாக” கருதவும் வாய்ப்பு உண்டு. பாலூட்டிகளுக்கு உணவிடுதலை முற்றிலும் தவிர்க்க வேண்டும். பறவைகளுக்கும் இது பொருந்தும் என்றாலும், அது பறவை வகையையும், எந்த மாதிரியான இரையை அவற்றிற்கு கொடுக்கிறோம், எதற்காகக் கொடுக்கிறோம் என்பதையெல்லாம் பொறுத்தது. காகத்திற்கு இரை போடுவது போல எப்போதாவது இரை போடுவதால் பெரிதாக பாதிப்பு இருக்காது என்றாலும், தொடர்ந்து இரை கொடுப்பது அவற்றின் வாழ்வியலில் தாக்கத்தை ஏற்படுத்தலாம். இதற்கு நேரடியான ஒரே பதில் இல்லை என்றாலும், இரைபோடுவதால் எந்த மாதிரியான தாக்கம் ஏற்படும் என்பதைப் பற்றிய புரிதல் நம்மிடையே இல்லை. ஆகவே, இரை போடாமலேயே இருந்துவிடுவது நல்லது.

8. மயில்களின் எண்ணிக்கை அதிகரித்துவிட்டதா? அதற்கான காரணம் என்ன? அவை விளைநிலத்தில் பயிர்களை சேதப்படுத்துவதை எப்படி அடியோடு நிறுத்துவது?

தோகை விரித்தாடும் ஆண்மயில். Photo: Kalyan Varma

மயில்கள் இதற்கு முன் தென்படாத இடங்களிலும் இப்போது இருப்பது உறுதியாகியுள்ளது. ஈரப்பதம் மிக்க வாழிடங்களில் மழையளவு குறைந்து வறண்டு போனதால் அந்த இடங்களில் மயில்கள் வசிக்க ஏதுவான சூழலை ஏற்படுத்தியுள்ளது. அங்கெல்லாம் மயில்கள் இப்போது பரவியுள்ளன. கேரளாவில் அண்மையில் நடைபெற்ற ஆராய்ச்சியில் மேற்சொன்ன முடிவுகள் தெரியவந்தன. இது கிட்டத்தட்ட தமிழகத்தில் சில இடங்களுக்கும் பொருந்தக்கூடும்.

மயில்களால் பயிர்களுக்கு சேதம் ஏற்படுவதை கட்டுப்படுத்தத்தான் முடியுமே தவிர முற்றிலும் தவிர்க்க முடியாது. மயில்களால் தொந்தரவு ஏற்படும் பகுதிகள் என நம்பப்படும் பகுதிகளில் மயில்களின் கணக்கெடுப்பு நடத்துவது, பயிர்களின் விவரங்கள், சேதம் எவ்வளவு, எப்போது ஏற்படுகிறது என்பவற்றை முதலில் அறியவேண்டும். மயில்களின் எண்ணிக்கையைக் கட்டுப்படுத்தும் இரைகொல்லி உயிரினங்களின் எண்ணிக்கையையும், பரவலையும் கணக்கிடும் ஆராய்ச்சிகளை மேற்கொள்வதும் அவசியம். விளைநிலங்களுக்கு ஆண்டு தோறும் மயில்கள் சேதத்தை ஏற்படுத்துவதில்லை. அது எப்போது என்பதைத் தெரிந்து அந்த வேளையில் பயிர்களைப் பாதுகாக்கும் முயற்சிகளை அதிகப்படுத்த வேண்டும். பாதுகாக்கப்பட்டப் பகுதிகளுக்கு (Protected Areas) வெளியேயும் தென்படும் காட்டுயிர்களால் சேதம் அதிக அளவில் இருப்பின் அதை உறுதி செய்த பிறகு, அரசு இழப்பீடு அளிக்கும் திட்டத்தை ஏற்படுத்துதல் அவசியம். விவசாயிகளும் அவர்கள் பங்கிற்கு பயிர்களை காப்பீடு செய்தல் அவசியம்.

9. சாதகப் பறவை எது? அவை மழைநீரை மட்டுமே குடிக்குமா?

Left – Pied Cuckoo (Photo: Rama Neelamegam). Right – Pied Cuckoo with caterpillar (Photo:Wikimedia Commons)

சுடலைக்குயில் (Pied Cuckoo) தான் சாதகப் பறவை (வட மொழியில் சாதகா). வட இந்தியப் பகுதிகளில் இப்பறவை வந்தால் மழைவரும் எனும் நம்பிக்கை இன்றும் உள்ளது. புராண இதிகாசங்களில் இப்பறவை மழைநீரை மட்டுமே அருந்தும், மேகத்தை நோக்கிக் வாயைப் பிளந்து காத்திருக்கும் என மிகைப்படுத்தி சொல்லப்பட்டிருக்கும். அண்மையில் ஆரம்ப கட்ட அறிவியல் ஆய்வுமுடிவுகளால் இப்பறவையின் பரவல், அவற்றின் வலசை போகும் பண்பு பற்றிய தகவல்கள் சில கிடைத்துள்ளன . சுடலைக் குயிலில் மூன்று உள்ளினங்கள் (sub species) உள்ளன. முதலிரண்டு ஆப்பிரிக்காவில் உள்ளவை. மூன்றாவது தென்னிந்தியாவில் ஆண்டுதோறும் வசிப்பவை. இவை தவிட்டுக்குருவி முதலான பறவைகளின் கூட்டில் முட்டையிட்டுவிடும். மத்திய, வட இந்தியாவிற்கு மே மாத இறுதியில் மழைக்காலத்தின் தொடக்கத்தில் வரும் சுடலைக்குயில்கள் ஆப்பிரிக்காவில் இருந்து வலசை வருபவை. சுடலைக்குயில்கள் புழு, பூச்சி, பழங்கள் முதலியவற்றை இரையாகக் கொள்ளும்.

1௦. சிட்டுக்குருவி லேகியம் சாப்பிட்டால் ஆண்மை அதிகரிக்குமா? மயில் கறி எண்ணெய் மூட்டு வலியை போக்குமா? இணை சேராமலேயே மயில் முட்டையிடுமா? ஆந்தை அலறினால் கெட்ட சகுனமா? கழுகு கூட்டில் உள்ள குச்சிக்கு மந்திர சக்தி உண்டா? கழுகு வயதானவுடன் அதன் அலகை உடைத்து மீண்டும் வளர்த்துக் கொள்ளுமா? பச்சைக்கிளிளால் நம் எதிர்காலத்தை கணிக்க முடியுமா? அன்னம் பாலையும் நீரையும் பிரித்துக் குடிக்குமா?

இவை அனைத்துக்கும் ஒரே பதிலைக் கூற முடியாது. ஆனால், இவை போன்ற மூடநம்பிக்கைகள் எதற்கும் எந்த வித அறிவியல் ஆதாரமும் இல்லை என்பது மட்டும் உறுதி.


இந்து தமிழ் திசை – உயிர்மூச்சு இணைப்பிதழில் (இரண்டு பாகமாக) வெளியான கட்டுரைகளின் முழு வடிவம்.

18 Jan 2020
பறவைகள்: மூடநம்பிக்கைகளும் அறிவியலும்
https://www.hindutamil.in/news/supplements/uyir-moochi/535369-birds.html

15 Feb 2020
பறவைகள்: நம்பிக்கைகளும் உண்மையும்
https://www.hindutamil.in/news/supplements/uyir-moochi/539715-birds.html

Written by P Jeganathan

February 17, 2020 at 6:25 am

2017 – நினைவில் நிற்கும் சில தருணங்கள்

with 2 comments

கடந்த ஆண்டில் பார்த்த, ரசித்த நினைவில் நிற்கும் தருணங்கள் பல. அவற்றில் படங்களில் பதிவு செய்யப்பட்டவை சில. அவற்றில் சிலவற்றை (மாதத்திற்கு ஒன்றாக) இங்கே காணலாம். இந்த பூமிக்கும், அதிலுள்ள எல்லா உயிரினங்களுக்கும் இந்தப் புத்தாண்டு இனிதே அமைய வேண்டும்.


சிட்டுக்குருவியின் வீழ்ச்சியும், நாம் பெற்ற படிப்பினையும்

leave a comment »

எல்லாப் பறவைகளுமே அழகானவை. மனிதகுலத்திற்கு பல விதங்களில் நன்மை செய்பவை. சிட்டுக்குருவியும் அதில் அடக்கம். எனினும் நமக்கு சிட்டுக்குருவிகள் ஏனைய பறவைகளை விட கொஞ்சம் உசத்திதான். சிறு வயதிலிருந்து நம் வீட்டினருகிலேயே பார்த்து பழக்கப்பட்டவை. அவை சிறகடித்துப் பறப்பதையும், தத்தித் தத்திச் செல்வதையும், கூடு கட்ட இடம் தேடுவதையும், தானியங்களை கொத்திக் கொத்தி சாப்பிடுவதையும், இரண்டு குருவிகள் சண்டையிடும் போது தமது கால்களை பிணைத்துக்கொண்டு படபடவென சிறகடித்து கீழே விழுவதையும் கண்டிருப்போம். நமது வீட்டில் கூடு கட்டியிருந்தால் குஞ்சுகள் எழுப்பும் ஒலியைக் கேட்டு காலையில் நாம் கண்விழித்திருப்போம்.

House Sparrow (Female)

House Sparrow (Female)

இப்படி நம் அன்றாட வாழ்வின் ஓர் அங்கமாக இருந்த சிட்டுக்குருவி சில இடங்களில் இருந்து காணாமல் போனது. இவை திடீரென ஒரே நாளில் அவை இருந்த இடத்தை காலி செய்துவிட்டுப் போகவில்லை. கொஞ்சம் கொஞ்சமாக எண்ணிக்கையில் குறைந்து பின்பு முற்றிலுமாக அற்றுப்போயின. முக்கியாமாக நகரங்களின் சில  பகுதிகளில். ஏன் குறைந்து போயின என்பதை கண்டறிவதற்கு ஆராய்ச்சிகள் மேற்கொள்ளப்பட வேண்டும். அதன் பின்னரே தெளிவான காரணத்தை அறிந்து கொள்ள முடியும். ஒரு உயிரினம் குறைந்து போய்விட்டது என எப்போது சொல்ல முடியும்? பலகாலமாக, அறிவியல் பூர்வமான கணக்கெடுப்பு நடத்தி, முன்னொரு காலத்தில் அவ்வளவு இருந்தன, தற்போது இவ்வளவாகக் குறைந்து போய் விட்டன என்று சொல்ல முடியும். ஆனால், நம் வீட்டுக்கு அருகில் சிட்டுக்குருவிகள் தென்படவில்லையெனில் அந்தப் பகுதியிலிருந்தே அது முற்றிலுமாக அழிந்து விட்டது என்று சொல்லமுடியாது. நாமாக ஒரு காரணத்தையும், வெளிநாட்டிலிருந்து இறக்குமதி செய்வதும் கூடாது. ஆனால் இங்கு நடந்ததென்னவோ அதுதான்.

மேலை நாட்டின் மீது உள்ள மோகத்தினால் அவர்களைப் போல உடையணிந்து கொண்டோம். அவர்கள் சாப்பிடுவதையும், குடிப்பதையும் இங்கே கொண்டு வந்து நாமும் சுவைக்க ஆரம்பித்தோம். பரவாயில்லை. ஆனால் அவர்கள் நாட்டில் நடைபெற்ற நீண்ட கால பறவைகள் ஆராய்ச்சியின் அடிப்படையில் வெளிவந்த முடிவுகளை நம் நாட்டில் உள்ள பறவைகளுக்கும் பொருந்தும் எனக் கருதுவது முட்டாள்தனமான ஒன்று. இதற்குச் சிறந்த உதாரணம் இந்தியாவில் சிட்டுக்குருவிகள் குறைந்து போனதற்குக் காரணம் செல்போன் டவர்கள் எனச் சொல்வது. ஸ்பெயினில் சில காலம் நடைபெற்ற ஆராய்ச்சியின் முடிவில்,  செல்போன் டவர்களிலிருந்து வெளிவரும் மின்காந்த அலைகளும் கூட அங்குள்ள சிட்டுக்குருவிகளில் எண்ணிக்கை வீழ்ச்சிக்குக் காரணமாக இருக்காலாம் என்று சொல்லப்பட்ட ஒரு ஆராய்ச்சிக் குறிப்பை வைத்துக்கொண்டு, அது நம் நாட்டுக்கும் பொருந்தும் எனச் சொல்ல முடியாது. உணவையும் உடையையும் அவர்களைப் பார்த்து “காப்பி அடித்ததைப்” போல இதையும் செய்ய முடியாது.

ஆனால், இந்தியாவில் சிட்டுக்குருவியின் வீழ்ச்சிக்கு சில அரைவேக்காட்டு ஆராய்ச்சியாளர்கள் இந்தக்காரணத்தையே கற்பித்தனர், அவர்களின் கூற்றை நம்பிய பல வெகுசன ஊடகங்களும், இந்தக்காரணத்தையே பிரபலப்படுத்தியதால், இப்போது யாரைக்கேட்டாலும் “சிட்டுக்குருவி குறைந்து விட்டதா? அதற்குக் காரணம் செல்போன் டவர்கள் தான்” சொல்லுகின்றனர். இது நமது அறிவியல் மனப்பான்மையின்மையையே காட்டுகிறது. இதைப்போன்ற அறிவியல் ஆதாரமற்ற செய்திகள் பரவாமல் இருக்க வேண்டுமானால், உண்மையான காரணங்களை அலசி ஆராய்ந்து எடுத்துரைப்பது மிகவும் இன்றியமையாதது. அதைத்தான் திரு ஆதி. வள்ளியப்பன் இந்நூலில் செய்துள்ளார். சிட்டுக்குருவிகளின் வாழ்க்கை முறை, அவை நமது பண்பாட்டில் எப்படி இரண்டறக் கலந்திருக்கின்றன என்பதைப் பற்றிய சுவாரசியமான செய்திகளை இந்நூலில் தருகிறார். அதுவும், குழந்தைகள் முதல் பெரியோர் வரை அனைவரும் புரிந்துகொள்ளும் எளிய நடையில்.

chittu-kuruvigalin-vazhvum-veezhchiyum

மேலைநாடுகளில் ஏற்பட்ட சிட்டுக்குருவியின் வீழ்ச்சியால் இங்கு இந்தியாவில் நாம் பெற்ற படிப்பினை என்ன? நம் நாட்டில் சுமார் 1300 பறவையினங்கள் உள்ளன. அவற்றினைப் பற்றிய நீண்டகால ஆராய்ச்சி, கணக்கெடுப்புப் பணி முதலிய அறிவியல் பூர்வமாக தகவல் சேகரிக்கும் திட்டங்களை வெகுவளவில் ஊக்குவிக்க வேண்டும். அவற்றின் வாழிடங்களைப் பாதுகாக்கும் பணியில் ஈடுபடவேண்டும். கானமயில் (Great Indian Bustard) என்ற ஒரு பறவையினம் ஒரு காலத்தில் தமிழகத்தில் வெட்டவெளிகளிலும், பரந்த புல்வெளிகளிலும் திரிந்து கொண்டிருந்தன. ஆனால் வேட்டையாடப்பட்டதாலும், மக்கள் தொகை பெருக்கத்தால் அவற்றின் வாழிடம் இல்லாமல் போனதாலும், இன்று அப்படி ஒரு பறவை இங்கு இருந்தது என்பதே பலருக்கு தெரியாமல் போய்விட்டது. ஒரு காலத்தில் ஆயிரக்கணக்கில் வானில் வட்டமிட்டுக்கொண்டிருந்த பிணந்திண்ணிக்கழுகுகள் (Vultures) இன்று ஓரிரண்டாகக் குறைந்து, காண்பதற்கு அரிதான ஒன்றாகிவிட்டன. இன்று நம் கண்களுக்கெதிரே சில இடங்களிலிருந்து காணாமல் போன சிட்டுக்குருவியை முன்னுதாரனமாகக் காட்டி, பல இடங்களில் அற்றுப்போய்க்கொண்டிருக்கிற பல அரிய பறவையினங்களை காப்பாற்றும் எண்ணத்தை பொதுமக்களுக்கு ஊட்டவேண்டும்.

புறவுலகின் பால் நாட்டம் ஏற்பட, மனிதனையல்லாத உயிரினங்களின் மேலும், அவை வாழுமிடங்களின் மீதும் கரிசனம் ஏற்பட, அவற்றைப் பாதுகாக்கும் முயற்சியில் இறங்க, வித்தாக அமைவது பறவைகளைப் பார்ப்பது (Birdwatching) போன்ற செயல்கள். அதுவும் சிறு வயது முதலே இவ்வகையான இயற்கையை ரசித்துப் போற்றும் செயல்களில் ஈடுபடுவது புறவுலககினை மதிக்கும் தலைமுறையினை உருவாக்கும். புறவுலகின் பால் நமக்கு உள்ள ஆர்வத்தை வளர்த்துக்கொள்ள சிட்டுக்குருவி போன்ற மனிதர்கள் வசிக்கும் பகுதிகளிலேயே சுற்றித்திரியும் பறவைகளைப் பார்ப்பதிலிருந்து தொடங்கலாம். அவற்றின் எண்ணிக்கை குறையாமலிருக்க செய்ய வேண்டிய காரியங்களில் ஈடுபடலாம். அதற்கான ஆர்வத்தையும், ஊக்கத்தையும் இந்நூல் நிச்சயமாக ஊட்டும்.

ஆதி வள்ளியப்பன் எழுதிய “சிட்டு, குருவிகளின் வாழ்வும் வீழ்ச்சியும்” நூலுக்கு நான் எழுதிய அணிந்துரை. இதன் PDF இதோ.

நூல் விவரம்:
ஆதி வள்ளியப்பன் (2012). சிட்டு, குருவிகளின் வாழ்வும் வீழ்ச்சியும். தடாகம் & பூவுலகின் நண்பர்கள் வெளியீடு. பக்கங்கள் 88. விலை ரூ. 70. இந்நூலை வாங்க தொடர்பு கொள்க: தடாகம். தொலைபேசி எண் +91-89399-67179

இணைய வழியில் வாங்க உரலி இதோ

Written by P Jeganathan

December 30, 2012 at 12:23 am

Posted in Birds, Books

Tagged with

சிட்டுக்குருவி: சில பதிவுகள்

with 7 comments

சிட்டுக்குருவிகள் தற்போது பரவியிருக்கும் நிலையை அறிய சமீபத்தில் ஒரு இணையத்தள கணக்கெடுப்பு நடத்தப்பட்டது. இதைப்பற்றிய விவரங்களை இங்கே காணலாம் – Citizen Sparrow (1). சிட்டுக்குருவிகள் சில நகரப்பகுதிகளிலிருந்து காணாமல் போவதென்வோ உண்மைதான். அதற்காக அந்த இனமே அபாயத்திற்குள்ளாகியிருக்கிறது என கூப்பாடு போடுபவர்கள், செல்போன் டவர்களிலிருந்து வெளிவரும் மின்காந்த அலைகள்தான் அவை அழிந்துபொவதற்கான காரணம் எனும் தீர்கதரிசிகள் தயவு செய்து இந்த கட்டுரைகளைப் படிக்கவும்:

Sparrows, science and species conservation in India (2), சிட்டுக்குருவிக்கு இல்லை கட்டுப்பாடு (3) 

இந்த கணக்கெடுப்பில் பணிபுரிந்து கொண்டிருந்த போது பொது மக்களை இந்த கணக்கெடுப்பில் பங்குபெறச் செய்யும் ஒரு முயற்சியாக சிட்டுக்குருவி எனும் வார்த்தை வரும் தமிழ் சினிமாப்பாடல்களை FM ரேடியோக்களில் ஒலிபரப்பச் செய்யலாமே என்ற எண்ணம் உதித்தது. அதற்காக அத்தகையப் பாடல்களை யோசித்து பட்டியலிட்டேன். பத்துப் பாடல்கள் உடனடியாக ஞாபத்திற்கு வந்தது. மேலும் பலரிடம் தொலைபேசியில் தொடர்புகொண்டு அவர்களுக்குத் தெரிந்த பாடல்களை கேட்டறிந்து, இணையத்தில் தேடியதில் மொத்தம் 20 பாடல்கள் இருப்பதை அறிந்து கொண்டேன். அவ்வேளையில் ஆர்வம் மேலோங்க சினிமாப் பாடல்கள் மட்டுமின்றி, சிட்டுக்குருவிகளைப் பற்றிய இலக்கியக் குறிப்புகளையும் சேகரிக்கலானேன். இந்தத் தகவல்களின் தொகுப்புத்தான் இக்கட்டுரை.

சங்க இலக்கியங்களிலும் சிட்டுக்குருவிகளைப் பற்றிய குறிப்புகள் இருப்பதாக அறியப்படுகிறது (4). மகாகவி பாரதியும் அவரது கட்டுரையில் சிட்டுக்குருவியின் அழகை வர்ணித்துள்ளார். கப்பலோட்டிய தமிழனில் மகாகவி பாரதியார் (நடிகர்: எஸ் வி சுப்பையா) சமைக்க வைத்திருந்த அரிசியை சிட்டுக்குருவிகளுக்கு (கூர்ந்து கவனித்தபோது அந்தப்படத்தில் காட்டப்பட்டவை சிட்டுக்குருவிகளைப்போலத் தெரியவில்லை, சில்லை என்றழைக்கப்படும் Munia போல இருந்தது.) இரைத்துவிடுவார். அதைப்பார்த்து கோபிக்கும் செல்லம்மாவிடம்,”…விட்டு விடுதலையாகி நிற்பாய் இந்தச் சிட்டுக்குருவியினைப் போலே…” எனப்பாடுவார் (5).

சிட்டுக்குருவிகளைப் பற்றிய மற்றுமொறு சுவாரசியமான குறிப்பு இந்திய விடுதலைப்போராட்டத் தலைவர்களில் ஒருவரான மெளலானா அபுல் கலாம் ஆசாத் எழுதியது. அவர் அஹமதாபாத் சிறையில் இருந்தபோது அவரது அறையில் பல சிட்டுக்குருவிகள் கூடுகட்டி வாழ்ந்து வந்தன. அந்த குருவிகள் கூடுகட்ட எடுத்து வரும் வைக்கோல்கள், நார்கள் முதலியனவற்றின் மிச்ச மீதி அவரது அறை முழுவதும் விழுந்து குப்பை சேருவதையும், அதனால் தினமும் பல முறை அவரது அறையை அவரே கூட்டி சுத்தம் செய்ததையும், இதனால் அந்த சிட்டுக்குருவிகளை அவரது அறையை விட்டு விரட்ட அவர் எடுத்துக்கொண்ட முயற்சிகளையும், அதில் தோல்வியடைந்து, பின்னர் அந்த சிட்டுக்குருவிகளையே நேசித்து அவற்றிற்கு தானியங்களையும், அரிசியையும் உணவாக அளித்ததையும் மிக அழகாக விவரித்து, தனது நண்பர்களுடன் பகிர்ந்து கொண்ட கடிதங்களை Ghubar-e-khatir எனும் புத்தகத்தில் காணலாம். இந்த உருது மொழிப் புத்தகத்தின் ஆங்கில மொழியாக்கம் Sallies of Mind. இந்தப் புத்தகத்திலிருந்து சிட்டுக்குருவியினைப் பற்றிய குறிப்பினை மட்டும் Birds of India – A Literaty Anthology எனும் தொகுப்பில் காணலாம் (6).

சிட்டுக்குருவி சினிமாப் பாடல்களை சேகரிக்கும் வேளையில் எனது பெற்றோர்களிடம் இதைப்பற்றி கேட்டுக்கொண்டிருந்த போது எனது தங்கை மகன் என்னிடம் வந்து அவனுக்கு சிட்டுக்குருவிகளைப் பற்றிய பாடல் ஒன்று தெரியும் என்றான். மூன்றாம் வகுப்பில் அவன் படித்த அந்தப் பாடலை அவனது குரலிலேயே பாடியும் காண்பித்தான் அதை இங்கு கேட்கலாம்:

தமிழ் சினிமா பாடலில் புகழ் பெற்ற சிட்டுக்குருவி பாட்டு, எம். எஸ். ராஜேஸ்வரி அவர்கள் பாடிய (அஞ்சலிதேவி அவர்கள் நடித்த) சிட்டுகுருவி சிட்டுகுருவி சேதி தெரியுமா?..எனும் அருமையான பாடல். முதலில் சிட்டுக்குருவி எனத் தொடங்கும் பாடல்களை மட்டுமே சேகரித்து வந்தேன். பிறகு பாடலின் நடுவிலும் சிட்டுக்குருவி என வரும் பாடல்களையும் சேர்த்துக்கொண்டேன். சில பாடல்களில் சிட்டுக்குருவி எனும் வார்த்தை முழுவதும் வராது. சிட்டு என்றே வரும். அவற்றையும் சிட்டுக்குருவியான எண்ணியே இந்தப் பட்டியலில் சேர்த்துள்ளேன். இவ்வகையில் மொத்தம் 20 பாடல்களில் பல மிக மிக இனிமையானவை, புகழ்பெற்றவை, சிலவற்றை கேட்க சகிக்கவில்லை. இந்தப் பட்டியலில் உள்ள ஒரு சுவாரசியமான பாட்டு, “தென்னங்கீற்று ஊஞ்சலிலே..”. பாடலைப் பாடியவர்கள் P.B. சீனிவாஸ், S. ஜானகி. இவர்கள் இருவரும் சேர்ந்து பாடிய ஒரே பாடல் இது எனப் படித்ததாக ஞாபகம். இது உண்மையா? மற்றுமொறு விசேசம் இப்பாடலுக்கு உண்டு. பாடலை இயற்றியவர் எழுத்தாளர் ஜெயகாந்தன்!

இந்தப் பாடல்கள் அனைத்திற்கும் என்னால் முடிந்தவரை அப்படம் வெளியான ஆண்டு, இசையமைத்தவர், பாடியவர்கள், பாடலாசிரியர் முதலிய தகவல்களைத் தந்துள்ளேன்.  ஒரு சில பாடல்களுக்கு இவை கிடைக்கவில்லை. தெரிந்தால் வாசகர்கள் தெரிவிக்கவும். சில சமீபத்தியப் பாடல்களில் எதுகை மோனையாக அமைய வேண்டும் என்பதற்காகவே சிட்டு எனும் சொல்லை உபயோகித்தது போல இருக்கிறது. சிட்டு எனும் வார்த்தையைத் தொடர்ந்து அடுத்த வரிகளில் தொட்டு, மெட்டு, பட்டு போன்ற வார்த்தைகளைல காணலாம். அதேபோல குருவி…அருவி. இந்தச் சாயலை பழைய பாடல்களில் காணமுடிவதில்லை.

பட்டியல் இதோ:

சிட்டுக்குருவி ..சிட்டுக்குருவி ..சேதிதெரியுமா?.. 
படம்: டவுன் பஸ் 1955, பாடியது: எம். எஸ் ராஜேஸ்வரி, கெ. எம். ஷெரீப்,  இசை: கே. வி. மஹாதேவன்.

சின்னஞ் சிறு சிட்டே எந்தன் சீனா கல்கண்டே
படம்:  அலிபாபாவும் 40 திருடர்களும், 1956, பாடியது: எஸ். சி.கிருஷ்ணன் & ஜிக்கி,
பாடலாசிரியர் மருதகாசி, இசை: எஸ். தக்ஷிணாமூர்த்தி.

தென்னங்கீற்று ஊஞ்சலிலேசிட்டுக்குருவி பாடுதுதன் பெட்டைத் துணையைத்தேடுது
படம்: பாதை தெரியுது பார் 1960, பாடியது: பி. பி.ஸ்ரீநிவாஸ் & எஸ். ஜானகி,
பாடலாசிரியர்: ஜெயகாந்தன், இசை: எம். பி. சீனிவாசன்.
 
பட்டுவண்ணச்சிட்டு படகுதுறைவிட்டு
படம்: பரிசு 1963, பாடியது: டி. எம். செளந்தர் ராஜன், பாடலாசிரியர்: கண்ணதாசன்,
இசை: கே. வி. மஹாதேவன்.

சிட்டுக்குருவி முத்தம் கொடுத்து சேர்ந்திடக் கண்டேனே..
படம்: புதிய பறவை 1964 பாடியது: பி. சுசீலா, பாடலாசிரியர்: கண்ணதாசன்,
இசை: விஸ்வநாதன்-ராமமூர்த்தி.

சிட்டுக்குருவிக்கென்ன கட்டுப்பாடு?…
படம்: சவாலே சமாளி, 1971, பாடியது:  பி. சுசீலா, இசை: எம். எஸ் . விஸ்வநாதன்.

சிட்டுக்கு செல்லசிட்டுக்கு ஒருசிறகு முளைத்தது
படம்: நல்லவனுக்கு நல்லவன், 1984 பாடியது: கே.ஜே. ஏசுதாஸ், பாடலாசிரியர்: நா. காமராசன்,
இசை: இளையராஜா.

ஏ குருவிசிட்டுக்குருவி
படம்: முதல் மரியாதை, 1985,பாடியது:மலேசியா வாசுதேவன், எஸ். ஜானகி,
பாடலாசிரியர்: வைரமுத்து, இசை: இளையராஜா.

சிட்டுக்குருவி வெக்கப்படுது..
படம்: சின்னவீடு, 1985, பாடியது: எஸ். பி. பாலசுப்ரமணியம், எஸ். ஜானகி, இசை:இளையராஜா.

சிட்டுகுருவி..தொட்டுதழுவி..
படம்: வீரபாண்டியன் 1987, பாடியது: மலேசியா வாசுதேவன், சித்ரா, இசை: ஷங்கர்-கணேஷ்.

பூஞ்சிட்டுக் குருவிகளா? புதுமெட்டுத் தருவிகளா?
படம்: ஒரு தொட்டில் சபதம் 1989. பாடியது &இசை: சந்திரபோஸ்.

சிட்டாஞ்சிட்டாங்குருவி உனக்குதானே
படம்: புது நெல்லு புது நாத்து, 1991, பாடியது: எஸ். ஜானகி, பாடலாசிரியர்: வைரமுத்து,
இசை:இளையராஜா.

பாலக்காட்டு மச்சானுக்கு பாட்டுன்னா உசிருசிட்டுக்குருவி சிட்டுக்குருவி சிரிக்கட்டுமே பெட்டைக்குருவி
படம்: மே மாதம், 1994, பாடியது: ஜி.வி. ப்ரகாஷ் & நோயல் ஜேம்ஸ், பாடலாசிரியர்: வைரமுத்து,
இசை ஏ. ஆர். ரஹ்மான்.

புல்வெளி புல்வெளி எங்கும் பனித்துளி பனித்துளிசிட்சிட்சிட்சிட்சிட்டுக்குருவி
படம்: ஆசை, 1995, பாடியது: கே. எஸ். சித்ரா, இசை:தேவா

சிட்டு சிட்டு குருவிக்கு கூடுஎதுக்கு
படம்: உள்ளத்தை அள்ளித்தா, 1996, பாடியது:  மனோ, சுஜாதா, பாடலாசிரியர்: பழனிபாரதி, இசை: சிற்பி,

சிக்கிலெட்டு சிக்கிலெட்டு சிட்டுக்குருவி
படம்: பூவே உனக்காக, 1996, இசை:எஸ். ஏ. ராஜ்குமார்,

சிட்டுக்குருவி குருவி குருவி தனது இருசிறகை விரிக்குதே
படம்: நானும் ஒரு இந்தியன், 1997, பாடியது: எஸ். ஜானகி, மனோ, இசை: இளையராஜா

என்னைத்தொட்டுவிட்டுதொட்டுவிட்டுஓடுதுஒருசிட்டுக்குருவி
படம்: பூ மனமே வா 1999, பாடியது: எஸ்.பி. பாலசுப்ரமணியம், சித்ரா,
பாடலாசிரியர்: பழனிபாரதி, இசை: சிற்பி.

சிட்டு சிட்டு குருவிக்கந்த வானத்துல பட்டுரெக்க விரிக்க சொல்லித்தரனுமா?..
படம்: அழகி, 2002, பாடியது: பவதாரனி, பாடலாசிரியர்: பழனிபாரதி, இசை: இளையராஜா.

சிட்டுக்குருவி அருவியக் குடிக்கப்பாக்குது
படம்: பரசுராம், 2003, பாடியது: ஸ்வர்ணலதா, அர்ஜுன், ஸ்ரீராம் பார்த்தசாரதி,
பாடலாசிரியர்: பழனிபாரதி, இசை: ஏ.ஆர். ரஹ்மான்.

 

இந்தப் பட்டியலை சேகரிக்க பலர் உதவிபுரிந்தனர். குறிப்பாக எனது பெற்றோர்கள், மோகன் மாமா, அறம் ஆகியோருக்கும், சிறுவர் பாடலை பாடிய கபிலனுக்கும் எனது நன்றிகள்.

குறிப்பெடுக்க உதவிய நூல்கள், கட்டுரைகள், வலைதளங்கள் :

1. Citizen Sparrow: http://www.citizensparrow.in/

2. Sundar, KSG. 2010. The New Indian Express, (Zeitgeist Suppl.), 10 Jul 2010, pg. 6

3. ப. ஜெகநாதன். 2012. சிட்டுக்குருவிக்கு இல்லை கட்டுப்பாடு. தினமணி (கொண்டாட்டம்), 22 ஏப்ரல் 2012.

4. Birds in Sangam Tamil: http://birdsinsangamtamil.wordpress.com/2011/05/01/birds-in-sangam-tamil/

5. Mahakavi Bharatiyar Katturaigal (Anthology of Bharat’s Essays) Compiled by D. Jayakantan and ‘Sirpi’ Balasubramaniam, Sahitya Akademi, New Delhi, Reprint 2008.

6. Birds of India – A literary Anthology. Edited by Abdul Jamal Urfi. (2008). Oxford University Press, New Delhi.

Written by P Jeganathan

November 19, 2012 at 1:57 pm

Posted in Birds

Tagged with ,

சிட்டுக்குருவி உங்கள் வீட்டுக்கு வருகிறதா?

leave a comment »

”சிறிய தானியம் போன்ற மூக்கு; சின்னக் கண்கள்; சின்னத் தலை; வெள்ளைக் கழுத்து; அழகிய மங்கல் வெண்மை நிறமுடைய பட்டுப் போர்த்த வயிறு; கருமையும் வெண்மையும் கலந்த சாம்பல் நிறத்தாலாகிய பட்டுப் போர்த்த முதுகு; சிறிய தோகை; துளித் துளிக் கால்கள்”.

சிட்டுக்குருவியை வர்ணிக்கும் இந்த வரிகள் யாருடையது என்றுத் தெரிகிறதா? மகாகவி பாரதியாருடையவை! வெள்ளைக் கழுத்து என்று சொல்லியிருப்பதால் அவர் பெட்டைக்குருவியைக் குறிப்பிடுகிறார் என்று தெரிகிறது. ஆண் சிட்டின் கழுத்தில் கருப்புத்திட்டு இருக்கும். பாரதியார் மட்டுமல்ல சங்க இலக்கியங்களும் சிட்டுக்குருவியைப் பற்றிப் பாடுகின்றன. குறுந்தொகையில் குறிப்பிடப்படும் ‘மனையுறை குரீஇ’ என்பது சிட்டுக்குருவியாகத்தான் இருக்கக் கூடும். குருவி என இன்று நாம் வழங்கும் வார்த்தை குரீஇ எனும் சொல்லில் இருந்துதான் வந்திருக்க வேண்டும்.

சிட்டுக்குருவிகளைப் பற்றி தமிழ் சினிமாப் பாடல்கள் பல உள்ளன. நீங்கள் கொஞ்சம் வயதானவராக இருந்தால் சட்டென உங்கள் நினைவுக்கு வருவது எம். எஸ். ராஜேஸ்வரி அவர்கள் பாடிய, ”சிட்டுக்குருவி சிட்டுக்குருவி சேதி தெரியுமா?..”, புதிய பறவையில் வரும், “சிட்டுக்குருவி முத்தம் கொடுத்து சேர்ந்திடக் கண்டேனே..” போன்ற பாடலாகத்தானிருக்கும். என்னைப்போல் 70வதுகளில் பிறந்தவராக இருந்தால், முதல் மரியாதையில் வரும், ”ஏ குருவி..சிட்டுக்குருவி..” நினைவுக்கு வரக்கூடும். நான் பட்டியலிட்ட வரை சிட்டுக்குருவி என தொடங்கும் பாடல்கள் மட்டும் பத்து. ஒரு நாள் முழுதும் யோசித்து, பலரிடம் தொலைபேசியில் கேட்டு, இணையதளங்களில் தேடி மொத்தம் பதினெட்டு தமிழ்ச் சினிமா பாடல்களின் வரிகளில் சிட்டுக்குருவி இருப்பதை அறிந்தேன். (அப்பதிவை இங்கே காண்க)

_JEG5817_700

சிட்டுக்குருவியைத் தெரியாதவர்கள் இருக்க முடியாது. மனிதர்கள் வாழும் பகுதியிலேயே வாழ்ந்து வரும் பறவையினம் இது. இப்படி நம் இலக்கியங்களிலும் அன்றாட வாழ்விலும், கலந்திருப்பவை சிட்டுக்குருவிகள். சில வருடங்களாகவே பத்திரிக்கைகளிலும் ஊடகங்களிலும் சிட்டுக்குருவிகள் அழிந்து வருகின்றன அவற்றை காப்பாற்ற வேண்டும் என்றெல்லாம் செய்திகள் வருவதைப் பார்த்திருக்கலாம். அவை குறைவதற்கான காரணங்கள் நகரமயமாதல், செல்போன் டவர்களில் இருந்து வெளிவரும் கதிர்வீச்சு என்றெல்லாம் அச்செய்திகளில் சொல்லப்பட்டிருக்கும். இதெல்லாம் எந்த அளவிற்கு உண்மை? இந்தியாவில் சிட்டுக்குருவிகள் சில இடங்களிலிருந்து மறைந்து போயிருக்கலாம். சில இடங்களில் முன்பு இருந்ததைவிட எண்ணிக்கையில் தற்போது குறைந்தும் போயிருக்கலாம். ஆனால் அவற்றின் எண்ணிக்கையை துல்லியமாக அறியவும், ஏன் குறைந்து வருகிறது என்பதையும் அறிய பல வருட  களப்பணிகள் மேற்கொண்டும், தகுந்த அறிவியல் ஆராய்ச்சியின் முடிவிலும் தான் அறியமுடியும்.

பொதுவாக செய்திகளில் தெரிவிக்கப்படும் செல்போன் டவர் கதிர் வீச்சு போன்ற காரணங்களெல்லாம் ஐரோப்பிய நாடுகளில் நடத்தப்பட்ட பல வருட ஆராய்ச்சியின் முடிவு. அங்கும் கூட இதுவும் ஒரு காரணமாக இருக்கக்கூடும் என யூகித்தார்களே ஒழிய இதுதான் முக்கிய காரணம் என திட்டவட்டமாகச் சொல்லவில்லை. இங்கிலாந்தில் சிட்டுக்குருவிகள் அழியும் நிலையில் உள்ளன. அதற்கான காரணங்கள் பல. நகரங்களில் இருந்த தோட்டங்கள், புதர்ச்செடிகள் வெகுவாகக் குறைந்து போனது, அவை கூடமைக்க ஏதுவான இடங்கள் இல்லாமல் போனது, முட்டை பொரிக்கும் காலங்களில் புழு, பூச்சிகளின் தட்டுப்பாட்டினால் குஞ்சுகளுக்கு சரியான இரையில்லாமல் போவது போன்றவையே காரணமாக இருக்கலாம் எனச் சொல்லப்பட்டது. இவற்றில் எதாவது ஒன்று மட்டுமே இல்லாமல் இவையனைத்துமே காரணமாக இருக்கவும் கூடும் என்றறியப்பட்டது.

_JEG5894_700

மேலை நாடுகளில் ஓரு குறிப்பிட்ட இடத்திலிருந்து அவை மாயமாய் மறைந்து, எண்ணிக்கையில் குறைந்து விட்டன என்று சொன்ன போது அவர்களிடம் அதற்கு முன் அந்த இடத்தில் எத்தனை சிட்டுக்குருவிகள் இருந்தன என்ற தகவல் இருந்தது. அதாவது ஒவ்வொரு வருடமும் கணக்கெடுப்பு நடத்தியதால் முன்பிருந்ததை விட இப்போது குறைந்து விட்டன என துல்லியமாகச் சொல்ல முடிந்தது. அமெரிக்காவில் கிருஸ்துமஸ் தினத்தன்று அந்நாட்டின் நகரங்களின் பல பகுதிகளில் சுற்றித்திரியும் பறவைகளை கணக்கிடுவார்கள். இப்பணியில் பல தன்னார்வலர்கள் பங்குகொண்டு அவர்கள் பார்த்தவற்றை பதிவு செய்து விஞ்ஞானிகளிடம் அத்தகவலை பகிர்ந்து கொள்வார்கள். இதைப் போன்ற திட்டங்களை நம் நாட்டிலும் செயல்படுத்த வேண்டும். இத்திட்டங்கள் பறவைகளையும், அவற்றின் வாழிடங்களையும் பாதுகாக்கும் எண்ணத்தை பொதுமக்கள் மத்தியில் ஏற்படுத்த உதவும். பொதுமக்கள் அறிவியல் ஆராய்ச்சியில் பங்கு கொள்ளும் இத்திட்டங்களுக்கு மக்கள் அறிவியல் (Citizen Science) என்று பெயர்.

பறவைகள் நாம் வாழும் சூழலின் தன்மையை, நிலையை அறிய உதவும் ஒரு உயிரினம். அதாவது சூழியல் சுட்டிக்காட்டிகள். ஒரு சில வகைப் பறவைகள் ஓரிடத்திலிருந்து குறைந்தாலோ, அழிந்துவிட்டாலோ அவ்விடங்களின் நிலை சீரழிந்து வருகிறது என்பதற்கான அறிகுறியாகும். ஆகவே நம் வீட்டின் அருகிலுள்ள பறவைகளை அடையாளம் கண்டு அவ்வப்போது அவற்றின் எண்ணிக்கையைப் பற்றிய குறிப்புகளை சேகரித்து வைக்கலாம். பறவைகளின் மேல் மட்டுமல்லாமல் இயற்கையின் மீதான கரிசனத்தை இவ்வகையான செயல்கள் அதிகப்படுத்தும்.

 பெண் சிட்டுக்குருவியின் மண் குளியல் (Dust Bathing)

பெண் சிட்டுக்குருவியின் மண் குளியல் (Dust Bathing)

உங்கள் வீட்டினருகில் சிட்டுக்குருவிகள் வருகின்றனவா என கவனியுங்கள். வந்தால் கொஞ்ச நேரம் அவற்றை பார்த்து ரசித்துக் கொண்டேயிருங்கள். தினமும் அவற்றை உங்கள் வீட்டினருகில் வரவழைக்க வேண்டுமா? கப்பலோட்டிய தமிழன் சினிமா பாருங்கள். அதில் பாரதியார் ஒரு காட்சியில் செல்லம்மா கடன் வாங்கி வைத்திருந்த அரிசியை முற்றத்தில் சிட்டுக்குருவிகள் கொத்திச் சாப்பிடுவதற்காக இரைத்து விடுவார். இதைக்கண்டு கோபித்துக்கொள்ளும் செல்லம்மாவிடம் சிட்டுக்குருவிகளின் பசி தீர்த்ததை எண்ணிப் பெருமைப்பட்டு அப்பறவைகளைப் போல் கவலைப்படாமல் இருக்கச்சொல்லி, “விட்டு விடுதலையாகி நிற்பாய் இந்தச் சிட்டுக்குருவியினைப் போலே…” எனப் பாடுவர். அதைப்போல நீங்களும் சிட்டுக்குருவிகளுக்கு தினமும் கொஞ்சம் தானியங்களை வைக்கலாம். கூடவே ஒரு சிறிய பாத்திரத்தில் அவற்றின் தாகம் தீர்க்கத் தண்ணீரையும் வைக்கலாம்.

கூட்டில் பெண் சிட்டுக்குருவி. Photo: Tharangini Balasubramanian

கூட்டில் பெண் சிட்டுக்குருவி. Photo: Tharangini Balasubramanian

ஒரு சிறிய அட்டைப்பெட்டி இருந்தால் (ஷு வாங்கி வந்த பெட்டிகூட போதும்) அது பிரியாமலிருக்க இருபுறமும் பசையிட்டு ஒட்டி, சிட்டுக்குருவி நுழையும் அளவிற்கு ஓட்டை போட்டு வீட்டின் ஓரமாக உயரே தொங்கவிட்டால் சிட்டுக்குருவியின் குடும்பத்தையே உங்கள் வீட்டிற்கே கொண்டுவரலாம். அவற்றைப் பார்த்துக்கொண்டிருந்தால் நம் கவலை மறந்து, விட்டு விடுதலையாகி நிற்கலாம்!

******

காக்கை குருவி எங்கள் ஜாதி தொடர். எண் 2. புதிய தலைமுறை 19 ஜூன் 2012

Written by P Jeganathan

July 21, 2012 at 5:22 pm

சிட்டுக்குருவிகள் உண்மையிலேயே அழிந்து வருகின்றனவா?

with one comment

சில ஆண்டுகளாக மார்ச் மாதங்களில் பத்திரிக்கைகளில் அடிக்கடி இடம்பெறும் செய்தி சிட்டுக்குருவிகள் அழிந்து வருகின்றன என்பது. அதற்கான முக்கிய காரணங்கள் நகரமயமாதல், செல் போன் டவரிலிருந்து வரும் மின்காந்த அலைகள் என்றும் எனவே அவற்றைப் பாதுகாக்க வேண்டும் என்றெல்லாம் அக்கட்டுரைகளில் சொல்லப்பட்டிருக்கும். இதெல்லாம் எந்த அளவிற்கு உண்மை? இந்தக் கருத்துக்கள் எல்லாம் அறிவியல் ஆராய்ச்சியின் முடிவில் வெளிவந்த உண்மைகளா? அழிவின் விளிம்பில் இருக்கும் மற்ற பறவைகளைக் காட்டிலும் சிட்டுக்குருவியின் நிலை என்ன அவ்வளவு பரிதாபகரமாக உள்ளதா? இக்கேள்விகளுக்கான விடைகளை அறிய முற்படும் முன் பல சங்கதிகளை நாம் தெரிந்துகொள்ள வேண்டியுள்ளது.

ஆண் சிட்டுக்குருவி. Photo: Tharangini Balasubramanian

ஆண் சிட்டுக்குருவி. Photo: Tharangini Balasubramanian

சிட்டுக்குருவிகள் உலகின் பல பகுதிகளில் பரவியுள்ள ஒரு பறவையினம். பன்னெடுங்காலமாக மனிதர்களுக்கும் சிட்டுக்குருவிகளுக்கும் இருக்கும் பிணைப்பை நாம் அனைவரும் அறிவோம். இப்பறவைகள் மனிதர்கள் இருக்கும் பகுதிகளிலேயே அதிகம் தென்படும். உச்சந்தலையில் சாம்பல் நிறமும், தொண்டை கருப்பாகவும், உடலின் மேலே அரக்கு நிறத்திலும் இருப்பவை ஆண் குருவிகள். பெட்டையின் உடலில் இதைப்போன்ற நிறங்கள் இருக்காது, மாறாக வெளிறிய பழுப்பு நிறத்திலும்  அதன் முகத்தை கொஞ்சம் உற்று நோக்கினால் கண்களின் மேலே நீண்ட புருவமும் இருப்பதைக் காணலாம். மளிகைக்கடை வாசலிலும், மார்க்கெட்டுகளிலும், நம் தெருக்களிலும் பறந்து திரிவதை எளிதில் காணலாம். சில நேரங்களில் நம் வீடுகளிலுள்ள சுவர் இடுக்குகளில் கூட வந்து கூடமைக்கும். சிறுவயதிலிருந்து நாம் பார்த்துப் பழகிய பறவைகளில் சிட்டுக்குருவிகள் முதலிடம் வகிக்கும்.

பெண் சிட்டுக்குருவி. Photo: Tharangini Balasubramanian

பெண் சிட்டுக்குருவி. Photo: Tharangini Balasubramanian

ஒரு உயிரினம் அழிந்துகொண்டு வருகிறது என்று சொல்வதற்கு முன் அதற்கான ஆதாரங்களை நாம் முன் வைக்கவேண்டும். முன்பு 20000 இருந்தது இப்போது வெறும் 500 தான் இருக்கிறது என்று சொல்லும் போது, ஒரு காலத்தில் இருந்த அதன் எண்ணிக்கை நமக்குத் துல்லியமாக தெரிந்திருக்கிறது. இதுவே அடிப்படைத் தகவல். பிறகே அந்த உயிரினம் எண்ணிக்கையில் குறைந்துபோனதற்கான காரணத்தை ஆராய முற்படுவோம். இந்த அடிப்படைத் தகவல்களை தெரிந்துகொள்ளவே பல ஆண்டுகள் ஆராய்ச்சியில் ஈடுபடவேண்டும். ஆனால் இந்தியா முழுவதிலும் சிட்டுக்குருவிகள் எங்கெங்கு, எத்தனை இருந்தன என்கிற தகவல் இதுவரை இல்லை. இந்தத் தகவல் இல்லாமல், நாம் பார்க்கவில்லை என்பதற்காக அவை அழிந்து வருகின்றன என்றும் அதற்கான காரணங்களையும் தக்க ஆதாரங்களின்றி கூறுவது சரியல்ல. பிறகு எப்படி நம் பத்திரிக்கைகளில் சிட்டுக்குருவிகள் அழிந்து வருவதற்கான காரணங்கள் துல்லியமாக சொல்லப்படுகின்றன?

அத்தகவல்களெல்லாம் பெரும்பாலும் இங்கிலாந்திலிருந்து இறக்குமதிசெய்யப்படவை!  சிட்டுகுருவிகளைப்பற்றி இங்கிலாந்தில் 1940 களிலிருந்து இன்றுவரை ஆராய்ச்சிகள் மேற்கொள்ளப்பட்டு வருகிறது. பல பறவையியலாளர்கள் அந்நாட்டின் பல்வேறு பகுதிகளிலிருந்து அங்குள்ள சிட்டுக்குருவிகளின் எண்ணிக்கையை பல ஆண்டுகளாக கணக்கெடுத்து வருகின்றனர். ஒரு காலத்தில் பல இடங்களில் பரவியிருந்த சிட்டுக்குருவியை 2002ம் ஆண்டு அந்நாட்டில் அழிவின் விளிம்பில் இருக்கும் பறவைகளின் பட்டியலில் அந்நாட்டு அறிவியலாளர்கள் சேர்த்துவிட்டனர். சிட்டுகுருவிகளின் எண்ணிக்கை நகரப்பகுதிகளிலிருந்து முன்பு இருந்ததைக்காட்டிலும் சுமார் 90% வீழ்ச்சியடைந்துவிட்டதாக பலகாலமாக நடத்தப்பட்டுவரும் ஆராய்ச்சியின் வாயிலாகத் தெரியவந்தது.

இங்கிலாந்தில் 1920களிலேயே சிட்டுக்குருவிகள் கொஞ்சம் கொஞ்சமாக எண்ணிக்கையில் குறையத்தொடங்கின. அதாவது குதிரைவண்டிகள் போய் மோட்டார் வாகனங்கள் வந்த காலங்களில். குதிரைவண்டிகளில் கொண்டுசெல்லப்படும் மூட்டைகளிலிருந்து சிந்தும் தனியங்களையும், குதிரைகளின் கழிவுகளிலுள்ள செரிக்கப்படாத தானியங்களையும் உட்கொண்டு வாழ்ந்து வந்த சிட்டுக்குருவிகள் மோட்டார் வாகனங்களின் எண்ணிக்கை உயரத்தொடங்கிய பின் இப்பறவைகளின் எண்ணிக்கையும் குறைய ஆரம்பித்தன. எனினும் 2005ம் ஆண்டு நடத்தப்பட்ட கணக்கெடுப்பில் சுமார் 13 மில்லியன் சிட்டுக்குருவிகள் இருப்பது தெரியவந்தது. ஆனால் 1994 முதல் 2000 வரை தன்னார்வலர்களைக் கொண்டு நடத்தப்பட்ட கணக்கெடுப்பில் ஐரோப்பாவின் பல பகுதிகளில் சிட்டுக்குருவிகள் எண்ணிக்கையில் சற்று குறைந்தும், ஸ்காட்லண்டிலும், வெல்ஷிலும் அதிகரித்திருந்தது.

வீட்டுச் செல்லப்பிராணியாக வளர்க்கப்படும் பூனைகளும், நகரிலுள்ள காகங்களும் இவற்றை இரையாகக்கொள்வது, சிட்டுக்குருவிகள் கூடுகட்ட ஏதுவான பல புதர்ச்செடிகள் கொண்ட தோட்டங்கள் இல்லாமை, இனப்பெருக்க காலங்களில் குஞ்சுகளுக்குத் தேவையான பூச்சிகள் இல்லாமல் போவதால் ஏற்படும் உயிரிழப்பு போன்றவை காரணங்களாக இருக்கலாம் என்று பரவலாகத் தெரிவிக்கப்பட்டது. இவ்ற்றில் ஏதாவது ஒன்று மட்டுமே காரணமாக இல்லாமல் இவை அனைத்தும் ஒருங்கே சேர்வதால் சிட்டுக்குருவிகளின் எண்ணிக்கை குறையும் வாய்ப்புகள் அதிகமாக இருப்பதாகவும் அறியப்படுகிறது.

ஐரோப்பிய நாடுகளில் சிட்டுக்குருவிகள் பல இடங்களில் மறைந்து வருவதைக்கண்டு அது இந்தியாவிற்கும் பொருந்தும் என நினைத்து இங்கும் அவற்றின் இனம் அழியாமலிருக்க (?) பல நடவடிக்கைகள் எடுக்கப்பட்டது. மார்ச் 20ம் தேதி உலக சிட்டுக்குருவிகள் தினமாக கொண்டாடப்படுகிறது. உண்மையில் நம்நாட்டிலுள்ள சிட்டுக்குருவிகளின் நிலை அவ்வளவு மோசமாக இன்னும் போய்விட்டதாகத் தெரியவில்லை. ஒரு சில நகரங்களிலுள்ள குறிப்பிட்ட சில பகுதிகளில் இவற்றின் எண்ணிக்கை குறைந்திருக்கலாம், அப்பகுதிகளிலிருந்து மறைந்தும் போயிருக்கலாம். ஆனால் பல ஆண்டுகள் தொடர்ந்து இவற்றின் எண்ணிக்கையை இங்கெல்லாம் கணக்கெடுத்த பின்னரே நாம் இதன் வீழ்ச்சி பற்றியும் அதற்கான காரணங்களையும் அறுதியிட்டுச் சொல்லமுடியும். புறநகர்ப்பகுதிகளிலும், கிராமப்புறங்களிலும், இவற்றின் எண்ணிக்கை மாறாமலும், ஓரளவிற்கு நல்ல எண்ணிக்கையிலும் இருப்பதாக புதுதில்லி, உத்திர பிரதேசத்தின் சில பகுதிகளில் நடத்தப்பட்ட சில குறுகிய கால ஆராய்ச்சி முடிவுகளின் வாயிலாக அறியமுடிகிறது. இன்னும் சொல்லப்போனால் அமெரிக்காவில் சிட்டுக்குருவிகள் மனிதர்களால் கொண்டுசெல்லப்பட்டு இப்போது அவை எண்ணிக்கையில் மிகுந்து சில பகுதிகளில் அந்நாட்டுக்குச் சொந்தமான பல பறவைகளின் பெருக்கத்திற்கு இடைஞ்சலாக இருக்கிறது.

கூட்டில் பெண் சிட்டுக்குருவி. Photo: Tharangini Balasubramanian

கூட்டில் பெண் சிட்டுக்குருவி. Photo: Tharangini Balasubramanian

இந்நிலையில் இந்தியாவிலுள்ள சிட்டுக்குருவிகளுக்கு இந்த அளவிற்கு முக்கியத்துவம் கொடுக்கத்தான் வேண்டுமா? இந்தியாவில் அழிவின் விளிம்பில் தொற்றிக்கொண்டிருக்கும் பல பறவையினங்கள் இருக்கும் போது அவற்றையெல்லாம் காப்பாற்றும் முயற்சியின் ஈடுபடாமல் உலகெங்கிலும் காணப்படும் சிட்டுக்குருவிக்காக பரிதாபப்படுவது சரியா? இது எந்த விதத்திலாவது நம் நாட்டின் பல்லுயிர் பாதுகாப்பிற்கு உதவுமா?

உதவும். இதுவரை புலி போன்ற வசீகரமான விலங்குகளின் மேம்பாட்டிற்கான திட்டங்களை வகுப்பதற்கும், நிதி ஒதுக்கீடு செய்வதற்கும், விழிப்புணர்வு ஏற்படுத்துவதற்கும் தான் முதலிடம் தரப்பட்டு வந்தது. அந்த வகையில் பல இடங்களிலும் காணப்படும் சிட்டுக்குருவிகளின் பாதுகாப்பிற்காக அதற்கென ஒரு தினத்தைத் தேர்ந்தெடுத்து மக்களிடையே விழிப்புணர்வை ஏற்படுத்துவதும்  நல்லதே. இந்த விழிப்புணர்வை சிட்டுக்குருவிக்கு மட்டுமே இல்லாமல் நாம் நாட்டில் உள்ள பல அழிந்து வரும் பறவையினங்களுக்காகவும் செய்ய வேண்டும். அதற்கு சிட்டுக்குருவி பாதுகாப்பை ஒரு முதல் படியாக எடுத்துக்கொள்ளலாம். பறவைகளால் இயற்கைக்கும் மனிதகுலத்திற்கும் ஏற்படும் நன்மைகளை எடுத்துரைக்க இதைப்போன்ற தினங்களை ஒரு வாய்ப்பாகப் பயன்படுத்திக்கொள்ளலாம். இதனால் ஏற்படும் விழிப்புணர்வினால் அவற்றை பாதுகாக்கும் எண்ணமும், அவை அழியாமல் இருக்கச் செய்ய வேண்டிய தகுந்த ஆராய்ச்சியை மேற்கொள்வதற்கான வாய்ப்பும் பெருகும்.

பத்திரிக்கைகள் விழிப்புணர்வை ஏற்படுத்தும் வேளையில் ஒரு உயிரினத்தின் அழிவிற்கான அல்லது பெருக்கத்திற்கான காரணங்களை அத்துறையில் பலகாலமாக ஈடுபட்டு வருவோரிடம் கேட்டறிந்து பிரசுரிப்பதே நல்லது. எனினும் பல நேரங்களில் அனுபவமில்லாதவர்களின் கருத்துக்களையோ, வேறு நாட்டில் நடந்த ஆராய்ச்சியின் முடிவுகளையோ பத்திரிக்கைகள் வெளியிடுகின்றன. இதைப் போன்ற ஆராய்ந்தறியாமல் வெளியிடப்படும் அரைவேக்காட்டுச் செய்திகளினால் மூன்று முக்கிய பிரச்சனைகள் எழுவதற்கான வாய்ப்புகள் இருப்பதாக பல காலமாக பறவை ஆராய்ச்சியில் ஈடுபட்டு வரும் கோபி சுந்தர் கூறுகிறார்.

முதலாவதாக பாறு கழுகுகளின் (Vultures) நிலையை உதாரணமாகக் சொல்லலாம். இப்பறவைகள் நம் நாட்டின் பல பகுதிகளிலிருந்து முழுவதுமாக அற்றுப்போய்விட்டன. அடுத்த சந்ததியினர் இப்பறவையை படங்களில் மட்டுமே பார்த்தறியும் நிலை ஏற்பட்டுள்ளது. தகுந்த அடிப்படைத்தகவல் இல்லாத சிட்டுக்குருவியின் வீழ்ச்சியை பெரிது படுத்துவதால் அழிவின் விளிம்பில் இருக்கும் இதைப்போன்ற பல பறவைகளைக் காப்பாற்ற வேண்டியதற்கான கவனம் சிதறியோ, திசைதிருப்பப்பட்டோ விடுகிறது. எதற்கு அக்கறை காட்ட வேண்டுமோ அதை விட்டுவிட்டு தேவையில்லாத அல்லது உடனடியாக கவனம் செலுத்தத் தேவையில்லாத ஒன்றிற்காக நம் நேரத்தையும், பணத்தையும் விரயம் செய்வது எந்த விதத்திலும் உபயோகமாக இருக்காது.

இரண்டாவதாக, இது தான் இப்பறவைகள் குறைவதற்கான காரணம் என அறிவிக்கப்படுவதாலும் அந்த செய்தியை பரவலாக்குவதாலும் பலரும் அதையே உண்மையென நம்பிவிடும் அபாயம் உள்ளது. இதனால் அறிவியல் துல்லியமான கருத்துக்களே மக்களைச் சென்றடைய வேண்டும் என்ற எண்ணத்தில் இத்துறையில் பலகாலமாக ஆராய்ச்சி செய்து வரும் விஞ்ஞானிகள் மற்றும் நிறுவனங்களின் நீண்டகால உழைப்பும் வீணாகிறது.

மூன்றாவதாக மிக முக்கியமானதாக, அத்தகவல்களை அவர்கள் மறுக்கும் போதோ, உண்மையான காரணங்களை முன் வைக்கும் போதோ அவர்களின் கூற்று செல்லுபடியாகாமல் போகும் அபாயமும் உள்ளது.

நீங்கள் சிட்டுக்குருவியின் காதலரா? அது குறைந்து போனதற்காக அனுதாபப்படுகிறீர்களா? அது மட்டுமே போதாது அவற்றை காப்பாற்றுவதற்கு. அவற்றின் எண்ணிக்கையை பெருக்கும் அறிவியல் பூர்வமான முயற்சிகளில் பங்களியுங்கள். சிட்டுக்குருவியை பார்க்கும் அதே வேளையில் இந்தியாவிலுள்ள சுமார் ஆயிரத்து முந்நூறு பறவைகளின் மீதும் கவனம் செலுத்துங்கள். உங்களது ஆர்வமும், அனுதாபமும் சிட்டுக்குருவியிலிருந்து தொடங்கட்டும்.

——————————————————————————————————————————————————————

22 ஏப்ரல் 2012 அன்று தினமணி நாளிதழின் “கொண்டாட்டம்” ஞாயிறு இணைப்பில் வெளியான கட்டுரை இது. இதன் PDFஐ இங்கே தரவிரக்கம் செய்யலாம்.

Dr. கோபி சுந்தர் (Dr. K. Gopi Sundar) சிட்டுக்குருவிகளைப் பற்றி எழுதிய ஆங்கிலக் கட்டுரையினை இங்கே காணலாம்.

——————————————————————————————————————————————————————

Citizen_sparrow_header

சிட்டுக்குருவிகள் குறைந்து விட்டன என்று சொல்லும் முன் இதற்கு முன் எவ்வளவு இருந்தது என்பதை தெரிந்திருப்பது மிக மிக அவசியம். ஆனால் இந்தியா முழுவதிலும் எங்கெங்கு எத்தனை சிட்டுக்குருவிகள் இருந்தன என்பது இதற்கு முன் கணக்கெடுக்கப்படவில்லை. இந்த அடிப்படைத் தகவலை இந்தியா முழுவதிலிருந்தும் திரட்டுவதற்கான முயற்சி citizensparrow எனும் மக்கள் அறிவியல் (Citizen Science) திட்டத்தின் மூலம் தொடங்கப்பட்டது. ஓரு குறிப்பிட்ட இடத்தில், குறிப்பிட்ட காலகட்டத்தில் சிட்டுக்குருவிகளின் இருப்பையும்(presence) இல்லாமையையும் (absence) இந்தியாவில் பல பகுதிகளிலிருந்து இக்காலகட்டத்தில் சுமார் பத்தாயிரம் பதிவுகள் செய்யப்பட்டது.

இந்த கணக்கெடுப்பு 1 ஏப்ரல் – 15 ஜூன் 2012 வரை நடைபெற்றது. இது ஒரு இணைய கணக்கெடுப்பு. இக்கணக்கெடுப்பின் சுருக்கமான தரவுகள் சில:

  • பல இடங்களில் முன்பு இருந்ததை விட தற்போது எண்ணிக்கையில் சற்று குறைந்துள்ளது*†.
  • சிறுநகரங்களையும், கிராமங்களைக்காட்டிலும் மாநகரங்களில் சிட்டுக்குருவிகளின் எண்ணிக்கை மிகக்குறைவாக இருப்பது தெரியவந்தது.
  • எனினும் இது மாநகரத்திற்கு மாநகரம் மாறுபட்டு இருந்தது. உதாரணமாக மும்பை, கோயம்பத்தூர் முதலிய நகரங்களில் பல இடங்களில் பரவியிருந்ததும், பெங்களூரு, சென்னை முதலிய நகரங்களில் பல இடங்களில் இல்லாமலும் இருந்தது தெரியவந்தது.

முழுவிவரங்களையும் (ஆங்கிலத்தில்) இந்த PDFல் காணலாம். மேலும் விவரங்களுக்கு www.citizensparrow.in இணையத்தை பார்க்கவும்.

*†இக்கணக்கெடுப்பின் தரவுகளை மிகவும் கவனத்துடன் விளக்கவும், புரிந்து கொள்ளவும் வேண்டும். முதலில் இது ஒரு இணையக் கணக்கெடுப்பு என்பதை கருத்தில் கொள்ள வேண்டும். குறுகிய காலகட்டத்தில் விரைவாக நடத்தப்பட்ட இக்கணக்கெடுப்பின் தரவுகள் ஓரளவிற்கு சிட்டுக்குருவிகளின் நிலையை வெளிப்படுத்தினாலும் நீண்ட கால ஆராய்ச்சிக்குப் பின்னரே அவை எண்ணிக்கையில் குறைந்து  அல்லது அதிகமாகி வருகின்றனவா என்பதை அறுதியிட்டுச் சொல்ல முடியும். இத்தரவுகளை மேலோட்டமாக புரிந்து கொண்டு பொத்தம் பொதுவாக எல்லா இடங்களிலும் சிட்டுக்குருவிகள் குறைந்து வருகின்றன எனும் முடிவுக்கு வந்து விடக்கூடாது.

Written by P Jeganathan

April 30, 2012 at 1:17 pm

Posted in Birds

Tagged with ,