அஞ்சல் தலையும் பறவைகளும்-30

காட்டுயிர்கள் மீதும், அவற்றின் வாழிடங்கள் மீதும் அக்கறை கொண்டவர் முன்னாள் பிரதம மந்திரியான இந்திராகாந்தி அவர்கள். பறவை நோக்கலில் ஆர்வம் கொண்டவர். அவரது தந்தையும், இந்தியாவின் முதல் பிரதமருமான பண்டித ஜவர்ஹலால் நேரு தேராதூன் சிறையில் இருந்து நைனித்தால் சிறையில் இருந்த இந்திரா காந்திக்கு, Dr.சாலீம் அலி எழுதிய “The Book of Indian Birds” எனும் நூலை அனுப்பியிருக்கிறார்.

Photo from Sanctuary Asia Article (see here)

Dr. சாலீம் அலியுடன் அவருக்கு இருந்த நட்பினாலும், அவருக்கு இயற்கையின் மீதிருந்த அக்கறையினாலும் இந்தியாவில் தற்போது உள்ள பரத்பூர், அமைதி பள்ளத்தாக்கு போன்ற பல வாழிடங்கள் பாதுகாக்கப்பட்டுள்ளது.

அஞ்சல் தலையும் பறவைகளும்-29

அஞ்சல் பொருட்கள் சேகரிப்பில் Permanent Pictorial Cancellations (நிரந்தர வரைபட முத்திரை) என்று ஒன்று உண்டு. நாம் அனுப்பும் அஞ்சலில் தேதியும், இடமும் கொண்ட வட்ட வடிவ முத்திரையைத்தான் பொதுவாக இடுவார்கள். ஆனால் ஒரு சில சிறப்புமிக்க ஊர்களில் அவ்வூரில் புகழ்பெற்றவையாக விளங்கும் வழிபாட்டுத் தளங்கள், தொலைநோக்கி மையங்கள், காட்டுயிர்கள் போன்றவற்றை வரைபடமாக முத்திரையில் அச்சு செய்து, நாம் கேட்டுக்கொண்டால் அந்த முத்திரையை நமது கடிதங்களில் வைத்து அனுப்புவார்கள்.

எடுத்துக்காட்டாக, கோடியக்கரை அஞ்சலகத்தில் அங்குள்ள கோடியக்கரை பறவைகள் சரணாலயத்தில் வலசை வரும் அழகிய பூநாரையின் வரைபடம் உள்ள முத்திரை இருக்கும்.

கோடியக்கரை அஞ்சல் அலுவலகத்தில் இருக்கும் Permanent Pictorial Cancellation குறித்த அறிவிப்புப் பலகை.

அதுபோலவே களக்காடு அஞ்சல் அலுவலகத்தில், சிங்கவால் குரங்கு (சோலைமந்தி) உள்ள முத்திரை இருக்கும்.

ஆனைமலை புலிகள் காப்பகத்தில் உள்ள டாப்ஸ்லிபில் வரையாடு தலை கொண்ட முத்திரை இருக்கும். தமிழ்நாட்டில் மட்டும் 31 அஞ்சலகங்களில் இது போன்ற நிரந்தர வரைபட முத்திரைகள் இடப்படுகின்றன.

அண்மையில் அகமதாபாத் சென்றிருந்த போது சபர்மதி ஆசிரமம் சென்றிருந்தேன். அதனருகில் உள்ள அஞ்சலகத்திலிருந்து என் குடும்பத்தாருக்கும் நண்பர்களுக்கும் கடிதம் எழுதி அதில் சபர்மதி ஆசிரமம் கொண்ட முத்திரையை வைத்து அனுப்பினேன்.

காந்தி ஆசிரமம் வரைபடம் கொண்ட வரைபட முத்திரை

அஞ்சல் தலையும் பறவைகளும்-28

ஜப்பான் நாட்டு அஞ்சல் தலைகள். நிப்பான் (Nippon) என்று எழுதியிருப்பதைக் காண்க.

ஜப்பானில் உள்ள வார்ப்ளிங் வெள்ளைக்கண்ணி Warbling White-eye (Zosterops japonicus). இந்தியாவிலும் ஒரு வகை வெள்ளைக்கண்ணி உண்டு.

இந்த அஞ்சல் தலையில் இருப்பது Eurasian Jay Garrulus glandarius யூரேசியன் ஜே அல்லது ஜே (Jay) என்று அழைக்கப்படும் காகம் இனத்தைச் சேர்ந்த பறவை.

அஞ்சல் தலையும் பறவைகளும்-27

தென் ஆப்பிரிக்கா வெளியிட்ட Montane Blue Swallow Hirundo atrocaerulea (நீலத் தகைவிலான்) உள்ள அஞ்சல் தலை. இவை ஆப்பிரிக்காவில் வெகு சில இடங்களில் மட்டுமே தென்படும் அரிய வகைப் பறவை. இவற்றின் வாழிடங்கள் அழிந்து வருவதால் இவை எண்ணிக்கையில் குறைந்து வருகின்றன.

அஞ்சல் தலையும் பறவைகளும்-26

Malayan partridge

Blue-breasted Quail

Barred buttonquail

மலேய கவுதாரி (Malayan partridge), நீலக்காடை (Blue-breasted Quail), வரிமார்பு குறுங்காடை (Barred Buttonquail) ஆகியவை கொண்ட மலேய நாட்டு அஞ்சல் தலைகள். இவற்றில் மலேய கவுதாரி மலேசியாவில் மட்டுமே தென்படுகிறது. நீலக்காடையை பொதுவாக இந்தியாவின் வட கிழக்கு மாநிலங்களில் காணலாம். வரிமார்பு குறுங்காடை இந்தியா முழுவதும் தென்படுகிறது.

அஞ்சல் தலையும் பறவைகளும்-25

அமெரிக்க நாட்டு அஞ்சல் தலை. இதில் உள்ளது அழகிய Red-headed Woodpecker (செந்தலை மரங்கொத்தி). இவை அமெரிக்காவின் மேற்குப் பகுதியைத் தவிர எல்லா இடங்களிலும் பரவிக் காணப்படுகிறது. கனடா நாட்டின் தென்பகுதிகளின் சில இடங்களிலும் தென்படும்.

அஞ்சல் தலையும் பறவைகளும்-24

Tibetan Sandgrouse Syrrhaptes tibetanus திபத்திய கல்கவுதாரி. தஜிகிஸ்தான் நாட்டு அஞ்சல் தலை. இந்தியாவில் இப்பறவையைப் பனிபடர்ந்த இமயமலைப் பகுதிகளில் உள்ள லடாகில் மட்டும் காணலாம்.

அஞ்சல் தலையும் பறவைகளும்-23

Sri Lanka whistling thrush (Myophonus blighi). நம்மூரில் உள்ள இனிமையாகப் பாடும் Malabar whistling thrush எனும் சீகாரப் பூங்குருவியின் குடும்பத்தைச் சேர்ந்த பறவை. இங்கே இதன் பழைய ஆங்கிலப் பெயரான Ceylon Arrenga என்று குறிப்பிடப்பட்டுள்ளது.

அஞ்சல் தலையும் பறவைகளும்-22

பிலிப்பைன்ஸ் தீவுகளில் மட்டுமே தென்படும் Philippine Eagle Pithecophaga jefferyi பிலிப்பைன்ஸ் கழுகு படத்தைக் கொண்ட அஞ்சல் தலை. உலகத்திலேயே மிகப்பெரிய கழுகு இது. குறிப்பாக இறக்கைகளை விரித்தால் சுமார் 2 மீட்டர் இருக்கும்.

அஞ்சல் தலையும் பறவைகளும்-21

மலேசியா வெளியிட்ட அஞ்சல் தலையில் காட்டு நீலக்குருவி (Asian Fairy-bluebird Irena puella). மேலும் அஞ்சல் துறையின் நூற்றாண்டு நினைவு அஞ்சல் தலையின் உள்ளே (Commemorative stamp) இதே அஞ்சல் தலையும் இன்னும் ஒரு மிகப் பழைய அஞ்சல் தலையும் இருபதைக் காணலாம். அதில் Straits Settlements postage என்று எழுதியிருக்கும். இதில் Straits Settlements ‘நீரிணை குடியேற்றங்கள்’ என்பது பிரிட்டிஷ் ஆட்சிக் காலத்தில் அவர்கள் கட்டுப்பாட்டில் இருந்த மலேசியாவின் ஒரு சில பகுதியைக் குறிக்கும். அப்போது அப்பகுதிகளுக்கென அஞ்சல் தலைகள் இருந்தன. அதன் நூற்றாண்டு நினைவாகவே (1867-1967) இந்த வித்தியாசமான சரிவக வடிவத்தில் (Trapezoid) அமைந்த அஞ்சல் தலை வெளியிடப்பட்டது.